Мурманск областида икки поезд тўқнашиб кетди

Мурманск областида Кандалакша районидаги Княжая станцияси яқинида Мурманск – Санкт-Петербург йўналиши бўйлаб ҳаракатланаётган 11-сонли йўловчи поезди билан юк поезди тўқнашиб кетди, деб хабар берди 18 декабр, чоршанба куни Фавқулодда вазиятлар вазирлиги.

Бахтсиз ҳодисадан сўнг аёл тез ёрдам машинасида вафот этди, деб хабар берди ТАСС агентлиги тезкор хизматларга таяниб. Вазирлик маълумотларига кўра, камида 14 киши жароҳатланган.

Касалхонага ётқизилган ўн кишидан етти нафарининг аҳволи ўртача оғир, камида саккизта вагон релсдан чиқиб кетган, деб ёзади ТАСС.

Агентлик Россия темирйўллари (РЖД)га таяниб, поезд ҳалокатидан сўнг бир киши вагон ичида қолиб кетганини хабар қилди. Ҳудудий офатлар тиббий марказининг вертолёти парвозга тайёрланмоқда, автобуслар йўловчиларни эвакуация қилиш учун жўнаб кетди.

Прокуратура терговни бошлади. Тергов қўмитаси томонидан темирйўл транспорти ҳаракати ва улардан фойдаланиш хавфсизлиги қоидаларини бузганлик (Жиноят кодексининг 263-моддаси) моддаси бўйича жиноят иши қўзғатилган.

Йўловчи поезди 326 кишини олиб кетаётган бўлиши мумкинлиги айтилган.

Тез ёрдам машиналари жабрланганларни Кандалакша марказий район касалхонасига етказмоқда.

Россия темирйўллари маълумотларига кўра, йўловчи поездида 326 киши бўлган.

Мурманск областидаги участкада поездлар ҳаракати тўхтатилди, оқибатларини бартараф этиш учун Кандалакша ва Кем станцияларидан қайта тиклаш таркиблари жўнатилди, деб ёзади Россия агентликлари.

Мурманск области губернатори Андрей Чибиснинг айтишича, тезкор штаб тузилган, еттита тез ёрдам бригадаси ҳудудга жўнаб кетган, захирадагилар шакллантирилмоқда. Воқеа жойига Кандалакша райони раҳбари йўл олди, Чибиснинг ўзи ҳам Москвадаги хизмат сафарини тўхтатиб, вилоятга қайтмоқда. Фавқулодда ҳолат сабаблари аниқланмоқда.