БМТ: Россия амалдорлари украиналик асирларни ўлдиришга чақирган

Украинадаги урушда рус ҳарбийлари томонидан асирга олинган украиналик аскарларга қарши репрессиялар сони кескин ошди. БМТнинг Украинадаги Инсон ҳуқуқлари мониторинги миссиясининг 3 феврал, душанба куни чоп этилган янги ҳисоботига кўра, бундай қатлларни Россия расмийлари қисман рағбатлантирмоқда.

Украина Қуролли кучларининг камида 79 аскари олти ой ичида қатл этилди

БМТ кузатувчилари маълумотларига кўра, 2024 йил август ойи охиридан буён 24 та алоҳида ҳодисада 79 та шундай суддан ташқари қатл кузатилган. Бир марта Украина Қуролли кучлари томонидан яраланган рус аскарининг ўлдирилиши аниқланган.

«Кўплаб украиналик ҳарбий асирлар таслим бўлгандан кейин ёки Россия Қуролли кучлари назорати остида бўлганида, воқеа жойида отиб ташланди. Гувоҳларнинг сўзларига кўра, қуролсиз ва ярадор украиналик ҳарбийларнинг ўлдирилгани ҳам кузатилган», — дея хабар беради БМТ миссияси. Унинг таъкидлашича, қатллар Украинанинг шарқий ҳудудларида Россия Қуролли кучлари ҳозирда олдинга силжиган ҳудудларда амалга оширилган.

Россияда қатл этиш ҳақидаги чақириқлар янграяпти

«Бу ҳодисалар ўз-ўзидан пайдо бўлмади. Россия Федерацияси расмийлари асирга олинган украиналик ҳарбий хизматчиларга нисбатан шафқатсиз муносабатда бўлишга ва ҳатто қатл этишга очиқ чақиришди, - деди миссия раҳбари Даниэл Белл. - Жавобгарликдан озод қилиш учун кенг асосларни таъминловчи қонунлар билан бирга, бундай баёнотлар ноқонуний хатти-ҳаракатни рағбатлантириши ёки уни қўзғатиши мумкин».

2024 йилда БМТ миссияси россиялик амалдорларнинг камида учта шундай чақириғини, шунингдек, «Россия кучларига алоқадор қуролли гуруҳларнинг ўлимга буйруқ берган ёки бундай ҳаракатларни маъқуллаган кўплаб ижтимоий тармоқлардаги постларини» қайд этган.

Бирлашган Миллатлар Ташкилотининг эслатишича, «шафқат бермаслик» ёки «ҳеч кимни тирик қолдирмаслик» ҳақидаги буйруқ ва чақириқлар халқаро гуманитар ҳуқуқнинг бузилиши ва уруш жинояти ҳисобланади.

«Ҳарбий қўмондонлар ва сиёсий раҳбарлар асирга олинган барча ҳарбий хизматчилар ва жанговар ҳаракатларда қатнашмайдиган шахсларни ҳимоя қилиш ва уларга инсоний муносабатда бўлишни таъминлаш бўйича аниқ буйруқлар бериши керак», — дея хулоса қилди Белл.