«Анора» — «Оскар»нинг бу йилдаги асосий филми бўлди. Унинг режиссёри Шон Бейкер тўртта мукофотни қўлга киритди

Лос-Анжелесда «Оскар» Киноакадемиясининг 97-тақдирлаш маросими бўлиб ўтди. Оқшом триумфатори «Анора» филмини суратга олган режиссёр Шон Бейкер бўлди. У жами тўртта шахсий ҳайкалчани қўлга киритди (сценарий, монтаж, режиссёрлик ва энг яхши филм учун) — унга қадар бир кечада бу қадар кўп мукофотни фақат Уолт Дисней қўлга киритган. Филм учун бешинчи статуэтка эса кутилмаганда унда бош ролни ўйнаган актриса Майки Мэдисонга насиб этди (бу категорияда «Субстанция» филми учун мавсум фавориткаси Деми Мурнинг ҳам номзоди қўйилганди, аммо у мукофотсиз қолди.

Режиссёр Бейкерга «Оскар»ни Квентин Тарантино топширди. «Квентин, агар сен Майкини «Бир куни Ҳолливудда» филмида суратга олмаганингда, «Анора» ҳам бўлмасди», деди у.

«Бу ҳақиқатан ҳам мустақил филм», - деди Бейкер кечанинг асосий мукофотини қабул қилиб олаётганда. У билан бирга картинани яратишда иштирок этган барча актёрлар, жумладан, россиялик Юра Борисов ҳам саҳнага чиқди.

У «Анора» филмидаги Игор роли учун «Иккинчи пландаги энг яхши эркак актёр» номинациясида иштирок этди, аммо бу номинациядаги мукофотни «Ҳақиқий оғриқ» (A Real Pain) филмидаги ижроси учун Киран Калкин қўлга киритди.

«Иккинчи пландаги энг яхши аёл актёр» номинацияси бўйича «Оскар» мукофотини «Эмилия Перес» мюзиклида Рита Мора Кастро ролини ижро этган Зои Салдана ўзиники қилди.

«Мен иммигрантлар фарзанди эканимдан фахрланаман, - деди у жуда ҳаяжонли нутқида. - Мен келиб чиқишига кўра доминиканлик бўлган ва «Оскар» олган биринчи аёлман ва охирги эмаслигимни ҳам биламан».

«Энг яхши актёр» номинациясида «Бруталист» драмасида Ласло Тота ролини ижро этган Эдриен Броуди «Оскар»ни қўлга киритди.

Латвиялик режиссёр Гинтс Зилбалодиснинг тошқиндан омон қолган мушук ҳақидаги «Оқим» (Flow) мултфилми энг яхши тўлиқ метражли анимацион филм сифатида тан олинди.

Бу Латвиядан «Оскар» олган биринчи картинадир.

Эронлик режиссёрларнинг «Сарв соясида» (In the Shadow of the Cypress) картинаси — энг яхши қисқа метражли анимацион филм бўлди.

«Бошқа ер йўқ» (No Other Land) картинаси энг яхши ҳужжатли тўлиқ метражли филм деб топилди. Бу филмда Иордан дарёсининг ғарбий соҳилидаги фаластинлик фаол ва исроиллик журналист ўртасидаги дўстлик ҳақида ҳикоя қилинади.

Ушбу номинацияда, шунингдек, Россиянинг кенг кўламли босқини бошланганида Харкивда яшаган уч нафар украиналик рассом ҳақидаги ҳикоя қилувчи «Чинни уруши» («Фарфоровая война») картинаси ҳам тақдим этилганди.

Филм учун энг яхши қўшиқ деб француз мусиқачилари Камий ва Клеман Дюкол, шунингдек, режиссёр Жак Одиар томонидан ёзилган «Эмилия Перес» филмидаги Эл Мал композицияси тан олинди. «Оскар»ни уларга Мик Жаггер топширди.

Қолган ғолиблар

Энг яхши либослар дизайни — Пол Тэйзуэлл («Ёвуз: Ғарб жодугари ҳақида эртак»)

Энг яхши мослаштирилган сценарий — Питер Строхан («Конклав»)

Энг яхши грим ва соч турмаги — Пиер-Оливе Персен, Стефани Гийон ва Мэрилин Скарселли («Субстанция»)

Энг яхши саҳналаштирувчи рассом иши — Нэйтан Краули и Ли Сандалес («Ёвуз: Ғарб жодугари ҳақида эртак»).

Энг яхши қисқаметражли ҳужжатли филм — «Оркестрдаги ягона қиз» (The Only Girl in the Orchestra).

Энг яхши овоз — «Дюна: иккинчи қисм».

Энг яхши визуал эффектлар — «Дюна: иккинчи қисм».

Энг яхши ўйинбоп қисқаметражли филм — «Мен робот эмасман».

Энг яхши операторлик иши — Лу Кроули («Бруталист»)

Хорижий тилдаги энг яхши филм — «Мен ҳали ҳам шу ердаман», (I'm still here) (Бразилия)

Филм учун энг яхши мусиқа — Дэниэл Блумберг («Бруталист»)

Энг кўп мукофотни қўлга киритган филмлар

«Анора» (Anora) — 5

«Бруталист» (The Brutalist)  — 3

«Ёвуз: Ғарб жодугари ҳақида эртак» (Wicked) — 2

«Эмилия Перес» (Emilia Perez) — 2

«Дюна: иккинчи қисм» (Dune: Part Two) — 2