Трамп "Алькатрас" қамоқхонасини қайта очишни буюрди

АҚШ президентининг айтишича, Калифорнияда қайта қурилган максимал хавфсизлик даражасидаги қамоқхонада «Американинг энг шафқатсиз ва зўравон жиноятчилари» сақланади ва у «қонун, тартиб ва адолат тимсолига айланади».

Фото: GlobalLookPress

АҚШ президенти Доналд Трамп 5 май, душанбага ўтар кечаси Калифорнияда 1963 йилда ёпилган "Алькатрас" қамоқхонасини қайта очишга буйруқ берди.

«Биз кўчаларимизга ёвузлик, қон тўкиш ва тартибсизликлар уруғини сепаётган бу кетма-кет жиноятчиларга энди тоқат қилмаймиз», деб ёзди Оқ уй раҳбари Truth Social платформасида. «Шунинг учун мен бугун Қамоқхоналар бюросига Адлия вазирлиги, Федерал қидирув бюроси ва Миллий хавфсизлик департаменти билан биргаликда Американинг энг шафқатсиз ва зўравон жиноятчиларни жойлаштириш учун кенгайган ва қайта қурилган "Алькатрас" давлат қамоқхонасини қайта очиш ҳақида буйруқ бераман».

«Биз энди ўз ишларини бажаришдан қўрққан ва мамлакатимизга ноқонуний йўллар билан келган жиноятчиларни чиқариб юборишга имкон бермайдиган жиноятчилар, безорилар ва судьялар асирига айланмаймиз. "Алькатрас"нинг қайта очилиши қонун, тартиб ва адолат рамзи бўлади», деб қўшимча қилди Доналд Трамп.

"Алькатрас" собиқ федерал қамоқхонаси Сан-Франциско кўрфазидаги оролда жойлашган. У 1912 йилда эски қалъа ўрнида қурилган ва дастлаб ҳарбий қамоқхона сифатида фойдаланилган, аммо 1936 йилда Адлия вазирлиги тасарруфига ўтказилган, қайта тикланган ва янада хавфсиз ҳолатга келтирилган. Маълум бўлишича, энг хавфли жиноятчилар «Алькатрас»га юборилган: хусусан, бу ерда машҳур гангстер Ал Капоне ҳам жазо муддатини ўтаган.

Тайёрлаган: Отабек Матназаров

#Алькатрас #Доналд Трамп