Трамп учинчи муддат, тинчлик музокаралари ва савдо уруши оқибатлари ҳақида гапирди

АҚШ президенти Доналд Трамп учинчи президентлик муддатига номзодини қўйиш имкониятини кўриб чиқаётгани ҳақидаги маълумотни рад этди. NBC телеканалига берган интервюсида у ўзининг эҳтимолий ворисларини, жумладан, вице-президент Жей Ди Вэнс ва давлат котиби Марко Рубио номзодларини санаб ўтди. Трамп, шунингдек, ўзи жорий қилган импорт божларининг оқибатлари ва Украинадаги урушни тўхтатиш бўйича саъй-ҳаракатлари ҳақида гапирди.

«Мен „саккиз йиллик“, „икки муддатли“ президент бўламан. Мен ҳар доим буни жуда муҳим деб ҳисоблаганман», – деган Трамп NBC телекомпанияси журналисти Кристен Уэлкерга берган интервюсида.

Ҳозирда 78 ёшда бўлган Трамп бунгача АҚШ президенти лавозимида учинчи ёки ҳатто тўртинчи муддат қолмоқчи экани ҳақида «ҳазиллашмаётгани»ни айтганди.

Бироқ, кейинчалик у ўз баёнотлари орқали «сохта янгиликлар сайтлари»ни тролл қилишни мақсад қилганини айтиб чиққанди.

Жума куни ўзининг Флоридадаги қароргоҳида ёзиб олинган интервюсида Трамп иккинчи муддат тугагандан сўнг президентлик лавозимида қолиш имкониятини кўриб чиқишни сўраган одамлардан кўплаб «илтимослар» бўлганини айтиб ўтди.

«Қанчадан қанча одамлар шундай қилишимни хоҳлашади. Аммо бу мен қилмоқчи бўлган иш эмас. Мен буни қилмайман», – деган Трамп ҳамда президент сифатида «тўрт ажойиб йил» бўлишини ва кейин ҳокимиятни бошқага – «идеал ҳолда буюк республикачи»га топширишни режалаштираётганини қўшимча қилди.

Make America Great Again («Американи яна буюк қиламиз») сиёсий ҳаракатининг келажаги ҳақидаги саволга президент ҳаракат бошқарувини ўз қўлига олиши мумкин бўлган одамларнинг «катта» гуруҳи борлигини айтди. Улар қаторида у АҚШ давлат котиби Марко Рубио ва вице-президент Жей Ди Вэнс номларини келтирди. «Мен ҳозир шу ерда ўтирган ҳолда 10, 15, 20 кишини айтишим мумкин», деди Трамп ўзининг вориси сифатида кимни кўриши ҳақидаги саволга тўғридан тўғри жавоб беришдан қочган ҳолда.

«Жеймс Ди жуда яхши ишлайди. У ажойиб. Марко ажойиб иш қилмоқда», – деди Трамп.

Трампнинг учинчи муддатга сайланиш истаги ҳақидаги гап-сўзлар Trump Organization компанияси апрел ойида Trump 2028 логотипи туширилган қизил кепкалар сота бошлаганидан сўнг авж олганди. «Келажак порлоқ кўриняпти! Trump 2028 кепкалари билан қоидаларни қайта ёзинг», дейилган маҳсулот тавсифида.

АҚШ конституциясига кўра, Оқ уйда иккинчи президентлик муддатини ўтаётган Трамп учинчи муддатга сайланиш ҳуқуқига эга эмас.

Конституциянинг 22-тузатишида «ҳеч ким икки мартадан ортиқ президентликка сайланиши мумкин эмаслиги» белгилаб қўйилган.

Конституцияга ўзгартириш киритиш учун Сенатда ҳам, Вакиллар палатасида ҳам конгрессменларнинг учдан икки қисмининг овози талаб этилади, бундан ташқари, бу таклиф штатлар ҳукуматларининг тўртдан уч қисми томонидан маъқулланиши керак бўлади.

Украинада тинчлик музокаралари ҳақида: «Биз томонлардан бири билан келишувга яқинмиз»

Трамп яна бир бор Россия ва Украина ўртасида тинчликка эришиш йўлида олдинга силжишни кўрмаса, воситачилик ҳаракатларини тўхтатишини айтди.

«Шундай вақт келадики, мен уларга шундай дейман: давом эттираверинглар. Аҳмоқлик қилишда давом этаверинг. Баъзида мен шундай ҳолатга келиб қоламан, кейин эса қандайдир ижобий нарса содир бўлади... Балки ҳеч нарса чиқмас, балки бунинг иложи ҳам йўқдир. Тушунишингиз керак, [Украина ва Россия ўртасида – таҳр.] жуда катта нафрат бор», – деди АҚШ президенти.

Трамп, бир томондан, Украинадаги урушни тўхтатишга эришиб бўлмаслиги мумкинлиги ҳақида гапирди, бошқа томондан - бу йўлдаги тараққиётни қайд этди.

«Менимча, биз томонлардан бири билан келишувга яқинроқмиз, бошқа томондан эса вазият мураккаброқ бўлиши мумкин. Кўрамиз. Ҳозир биз қайси томонга яқинроқ эканимизни аниқлаштирмоқчи эмасман. Аммо биз америкаликлар учун фойдали битим туздик», – деди Трамп Украина билан ерости бойликлари бўйича келишувни назарда тутиб.

«Ўтиш даври» тарифи тўғрисида

Трамп 2022 йилдан бери илк бор бозорларда ваҳима ва АҚШ иқтисодиёти қисқаришига олиб келган товарлар импортига эълон қилинган тарифлар ҳақидаги танқидларни рад этди.

«Менга қаранг, ҳаммаси жойида. Айтдим-ку, ўтиш даври деб. Ўйлайманки, бизда ҳаммаси ажойиб бўлади», – деган Трамп.

АҚШ иқтисодиёти қисқаришда давом этиши эҳтимоли ҳақидаги саволга жавобан АҚШ президенти шундай деди: «Ҳамма нарса бўлиши мумкин. Аммо ўйлайманки, биз мамлакатимиз тарихидаги энг яхши иқтисодиётга эга бўламиз».

Трамп, шунингдек, савдо уруши давом этаётгани сабабли америкаликлар дўконлардаги маҳсулотлар тақчиллигига тайёргарлик кўриши кераклиги ҳақидаги хавотирларни аритишга ҳаракат қилди.

«Йўқ, бундай деяётганим йўқ. Мен шунчаки 30 та қўғирчоқ сотиб олиш шарт эмаслигини айтяпман. Учтасини сотиб олиш мумкин. 250 та қалам бўлиши шарт эмас. Бешта олса ҳам бўлади», – деди у.