Россия қўшинлари буфер зона яратиш муаммосини ҳал қилмоқда – Путин

Россия президенти Владимир Путин мамлакат қуролли кучлари ҳозир Россия-Украина чегарасида хавфсизлик буфер зонасини яратиш масаласини кўриб чиқаётганини маълум қилди.

«Чегара бўйлаб зарур хавфсизлик буфер зонасини яратиш тўғрисида қарор қабул қилинганини аллақачон айтгандим. Қуролли Кучларимиз ҳозир бу муаммони ҳал қилмоқда. Душманнинг ўқ отиш нуқталари фаол равишда бостирилмоқда, иш олиб борилмоқда. Шу билан бирга, мен ҳозирданоқ Курск, Белгород ва Брянск вилоятларидаги вазиятни ҳисобга олган ҳолда, вайрон бўлган ҳамма нарсани тиклаш ва таъмирлаш бўйича ишларни бошлашимиз кераклигига эътибор қаратмоқчиман», деди Путин.

22 май ҳолатига кўра, Курск вилоятида, айниқса, Россия ва Украина кучлари ўртасида жанглар давом этаётган чегара ҳудудларида вазият кескинлигича қолмоқда.

Асосий тўқнашувлар Глушково ва Сужа туманларида содир бўлмоқда. Россия қўшинлари Украина қуролли кучларининг минтақа ҳудудига бостириб киришга уринишларини қайтармоқда, позицияларига зарба бермоқда.