Италия икки шарт билан Фаластинни тан олишга тайёр

Фаластин давлатини тан олиш барча гаровга олинганларни озод қилиш ва ҲАМАСни ҳокимиятдан четлаштириш билан амалга ошиши мумкин, деди Италия бош вазири Жоржа Мелони.

Фото: Benjamin Girette/ AP

Италия икки шарт бажарилса, Фаластинни давлат сифатида тан олиши мумкин: гаровга олинган барча исроилликларни озод қилиш ҳамда АҚШ ва Европа Иттифоқи томонидан террорчилик гуруҳи сифатида белгиланган — ҲАМАС вакилларини ҳокимият лавозимларидан четлаштириш. Бу ҳақда Италия бош вазири Жоржа Мелони 23 сентябр, сешанба куни Ню-Йоркда БМТ Бош ассамблеяси сессияси чоғида журналистлар билан суҳбатда маълум қилди.

Италиянинг ANSA ахборот агентлигидан иқтибос келтирган Мелонига кўра, сиёсий босим биринчи навбатда Исроилга эмас, балки ҲАМАСга нисбатан қўлланиши керак, чунки ҲАМАС урушни бошлаган ва гаровга олинганларни озод қилишдан бош тортиш орқали унинг тугашига тўсқинлик қилмоқда.

Бирлашган Миллатлар Ташкилоти Бош ассамблеясининг 80-сессияси арафасида бир қанча давлатлар, жумладан, Буюк Британия, Австралия, Канада, Португалия, Франция ва Белгия Фаластин давлатчилигини тан олишини эълон қилди. Умуман олганда, БМТга аъзо 193 давлатдан 150 дан ортиғи Фаластинни давлат сифатида тан олган.

Қўшма Штатлар, аксинча, Исроил каби тан олишга мутлақо қарши. АҚШ президенти Доналд Трамп БМТ Бош ассамблеясида сўзлаган нутқида шундай деди: «Ҳозир, гўё можаронинг давом этишини рағбатлантиргандек, БМТнинг баъзи аъзолари Фаластин давлатини бир томонлама тан олишга интилмоқда. ҲАМАС террорчиларининг ваҳшийликлари учун мукофот жуда катта бўлади. Бу даҳшатли ваҳшийликлар, жумладан, 7 октябр воқеалари учун мукофот бўлади». Исроил бош вазири Бинямин Нетаняҳу ҳам худди шундай баёнотлар билан чиққан.

Тайёрлаган: Отабек Матназаров

#Италия #Фаластин