Трафик учун кураш: дунёдаги энг оммабоп сайтлар

Google ва YouTube ҳали ҳам интернет-эътиборнинг номутаносиб равишда катта улушини ушлаб турибди ва барча рақобатчилардан анча олдинда.

Шу билан бирга, етакчилар таркиби аста-секин ўзгармоқда. ChatGPT дунёда энг кўп кириладиган сайтлар қаторидан жой олди — бу эса сунъий интеллект (СИ) воситалари қандай тез суръатда технологик янгиликдан кундалик иш қуролига айланганини яққол кўрсатади.

Semrush’нинг 2026 йил январ ойи бўйича ташрифлар ҳақидаги энг сўнгги маълумотларига кўра, рейтинг бугун рақамли манзарани қайси компаниялар шакллантираётганини акс эттиради. Қидирув тизимлари ва видеоплатформалар интернет фаоллигининг асоси бўлиб қолмоқда. Фақат Google’нинг ўзи кейинги бешта сайтнинг жами трафигидан ҳам кўпроқ ташрифни жалб қилади, YouTube эса дунё миқёсидаги бош видео-ҳаб мақомини янада мустаҳкамламоқда.

Топ-20 рўйхатидан бошқа қидирув платформалари ҳам ўрин олган: Bing (1,9 миллиард ташриф) ва DuckDuckGo (1,8 миллиард). Ҳатто Yahoo ҳам иккита домен орқали мавқеини сақлаб қолмоқда — yahoo.com (2,3 миллиард) ва yahoo.co.jp (1,8 миллиард). Бу қидирув ва портал хизматларининг барқарор ўрнини таъкидлайди.

Энг сезиларли ўзгаришлардан бири — ChatGPT’нинг пайдо бўлиши. 2026 йил январ ойида 5,5 миллиард ташриф билан платформа дунёда бешинчи ўринни эгаллади — у Reddit (5,1 миллиард), Wikipedia (4,3 миллиард) ва X (3,8 миллиард)дан ҳам олдинда.

ChatGPT илк марта 2024 йил бошида — ишга туширилганидан бир йилдан сал кўпроқ ўтиб топ-15 рўйхатига кирган. Унинг шиддатли ўсиши СИ-воситаларнинг кундалик иш жараёнларига қанчалик чуқур интеграциялашганини кўрсатади: матн ёзиш ва тадқиқотлардан тортиб, дастурлаш ва ғоялар генерациясигача.

Ижтимоий платформалар ҳамон ҳал қилувчи аҳамиятга эга. Facebook (9,5 миллиард ташриф) ва Instagram (6,1 миллиард) етакчи бешликка кирди, X (3,8 миллиард) ва TikTok (2,2 миллиард) эса глобал аудиториясини сақлаб қолмоқда.

Энг кўп ташриф буюриладиган сайтлар қаторида йирик электрон тижорат платформалари ҳам бор: Amazon (2,5 миллиард) ва Temu (1,6 миллиард). Бу онлайн ритейлнинг улкан кўламини акс эттиради.

Шу билан бирга, Netflix (1,5 миллиард) ва Weather (1,6 миллиард) кўнгилочар контент ҳамда тезкор маълумотлар барқарор равишда улкан, такрорий трафик келтиришини намоён қилади.

Умуман олганда, рўйхатда ҳали ҳам АҚШ компаниялари устун — топ-20нинг мутлақ кўпчилигини улар ташкил қилади. Бироқ рейтингда Хитой, Канада ва Франциядан бўлган платформалар ҳам бор, бу эса замонавий рақамли экотизимнинг глобал тусга эга эканини кўрсатади.