14 kishini Yevropaga ishga yuborishni va'da qilib, Ukrainada tekinga ishlatgan firibgarlarga jinoiy ish ochildi

Bosh prokuratura huzuridagi departament tomonidan jabrlanuvchilarning murojaati asosida o‘tkazilgan tergovga qadar tekshiruvda fuqarolar M.A. va S.S. oldindan til biriktirib, bir guruh o‘zbekistonliklarning ishonchiga kirib, ularni Yevropa davlatlariga oyiga 2000-3000 dollar to‘lanadigan ishga yuborish hamda ishchi vizalarini olib berish evaziga 5500 dollarni firibgarlik yo‘li bilan qo‘lga kiritgani aniqlangan.

Bundan tashqari, S.S. va boshqalar 2019 yilning noyabr oyida 14 nafar fuqaroni Ukrainaning Kiyev shahrida oyiga 500 dollar oylik to‘lanadigan qurilish ishlariga joylab, keyin Yevropa davlatlariga ishga o‘tkazib berishga ishontirishgan. Biroq ularning ishonchini suiiste'mol qilib, Kiyevdagi qurilish firmasida ularning pasportini olib qo‘yib, 75 kun davomida og‘ir mehnat sharoitlarida ishlatishgan. Shuningdek, 17 500 dollar miqdoridagi ish haqlarini bermay aldab kelishgan.

Shundan so‘ng ushbu fuqarolarni Belarusning Gomel shahriga va Rossiyaning Moskva shahriga olib borishib, shu yerdan Yevropaga ishchi vizasini olib berish haqida takroran chuv tushirishgan. Natijada o‘zbekistonliklar mazkur davlatlarda ishsiz yurib, turli qiyinchiliklarga duchor bo‘lishgan.

«Mazkur holatlar yuzasidan fuqarolar M.A., S.S. va boshqalarga nisbatan Jinoyat kodeksining 168-moddasi 2-qismi va 135-moddasi 2-qismi bilan jinoyat ishi qo‘zg‘atilib, tergov harakatlari o‘tkazilmoqda», – deyiladi Bosh prokuratura tomonidan taqdim etilgan ma'lumotda.