23 yanvardan barcha ta’lim muassasalarida darslar boshlanadi

23 yanvar, dushanba kunidan O‘zbekistondagi barcha hududlardagi barcha bo‘g‘indagi ta’lim muassasalarida (bog‘cha, maktab, akademik litsey, professional va oliy ta’lim muassasalari) o‘quv mashg‘ulotlari tiklanadi.

Shu tariqa, sovuq kunlar munosabati bilan uzaytirilgan qishki ta’til muddati tugamoqda.

Maktablarda ikkinchi chorak ta’tili odatdagi kabi 10 yanvarga qadar davom etib, 11 yanvardan uchinchi chorak boshlanishi rejalashtirilgandi. Ammo 5 yanvar kuni Maktabgacha va maktab ta’limi vazirligi havo harorati keskin tushib ketishi munosabati bilan qishki ta’til kunlari uzaytirilib, darslar 18 yanvardan boshlanishini e’lon qildi. Bu maktabgacha ta’lim muassasalariga ham taalluqli edi.

10 yanvar kuni esa viloyatlar hokimliklari darslar 11 yanvardan boshlanishini e’lon qila boshladi, faqat Farg‘ona viloyati hokimligida darslar boshlanish sanasi o‘zgartirilmadi. Vazirlik esa qishki ta’til davrini uzaytirish vakolati hududdagi ob-havo sharoitlarini inobatga olgan holda mahalliy hokimliklarga berilganini ma’lum qildi. 

11 yanvar kuni hududlarda maktablarga deyarli hech kim kelmadi (bu vaqtda havo harorati -15 daraja sovuq atrofida edi), natijada hokimliklar qishki ta’tilni avvaliga yana bir necha kunga, keyin esa 23 yanvarga qadar uzaytirishga majbur bo‘ldi.

Bu orada maktablarda ham, oliy ta’lim muassasalarida ham darslar fevralga qadar onlayn tarzda davom ettirilishi haqida xabarlar tarqaldi, ammo vazirliklar bu ma’lumotni rad etishdi.