Taniqli shoir Mirpo‘lat Mirzo olamdan o‘tdi

Taniqli shoir, tarjimon Mirpo‘lat Mirzo kecha 21 fevral, chorshanba kuni vafot etdi. Bu haqda shoir Muhammad Ismoil ijtimoiy tarmoqdagi sahifasida xabar bergan.

“Xudoyimning ishlari qiziq. Boyagina, O‘zbekiston Yozuvchilar uyushmasida ko‘rishgan edik. Odil Yoqubovning yubileyini o‘tqazishda birga bo‘lamiz deb suhbatlashgan edik. Ammo, hozirgina noxush xabar eshitdim. Mirpo‘lat akamizni berib qo‘yibmiz. Muhtaram do‘stlar. Joylari jannatdan bo‘lsin. Tilla inson edilar. O‘zbek she'riyatining zabardast pahlavoni edilar. Ertaga peshinga saloti janozaga”, - deb yozgan M.Ismoil.

Mirpo‘lat Mirzo 1949 yil 20 avgustda Chimkent viloyatining Sayram qishlog‘ida tug‘ilgan. O‘rta maktabni bitirgach, hozirgi O‘zbekiston Milliy universitetining jurnalistika fakultetiga o‘qishga kirgan va uni 1971 yilda tugatgan. 

Mehnat faoliyatini 1971 yilda hozirgi “Yangi asr avlodi” nashriyotida boshlagan. U O‘zbekiston Yozuvchilar uyushmasida adabiy maslahatchi, “Yozuvchi” nashriyotida bosh muharrir, Yozuvchilar uyushmasining kotibi vazifalarida ishlab keldi. Uzoq yillar “Jahon adabiyoti” jurnali bosh muharririning o‘rinbosari bo‘ldi.

Mirpo‘lat Mirzoning ijodi talabalik yillarida boshlangan. Dastlabki she'riy turkumi 1971 yilda “Guliston” jurnalida, ilk she'riy to‘plami esa 1975 yilda nashr etilgan. “Ishq fasli” (1978), “Yaxshi kunlar” (1981), “Sunbula” (1985), “Moviy daryo” (1988), “Atirgul va yulduzlar” (1990) kabi qator to‘plamlari chop etildi. 

Mirpo‘lat Mirzo mustaqillik yillarida barakali ijod qildi. She'rlaridan jamlangan “Saylanma” (2004), maqolalar, pesa, tarjimalar, she'rlardan iborat “Surur” (2009) majmuasi, esselar, safarnomani o‘z ichiga olgan “Rayhon isi” (2011) to‘plami bosilib chiqdi.

Tarjimon sifatida Mirpo‘lat Mirzo Lessingning “Donishmand Natan”, Shekspirning “Yoz tuni g‘aroyibotlari” asarlarini o‘zbek tiliga tarjima qildi. Bu asarlar o‘zbek Milliy akademik drama teatrida muvaffaqiyat bilan sahnalashtirildi. “Somon yo‘li chechaklari” (jahon she'riyati antologiyasi, 2004), “Sayra, do‘mbiram” (qozoq she'riyati antologiyasi, 2005), “Lojuvard osmon” (XX asr shoirlari, 2008) kitobi,“XX asr rus
she'riyati” (2010) tarjima majmualari nashr etildi.

O‘zbekistonda xizmat ko‘rsatgan madaniyat xodimi Mirpo‘lat Mirzo Pasternak nomidagi Rossiya (1998), “Alash” nomli Qozog‘iston xalqaro mukofotlari (2001) sohibi bo‘lgan.

KUN.UZ tahririyati marhumning oila a'zolariga, yaqinlariga chuqur hamdardlik bildiradi.