WorldSkills Russia agentligi rahbarlari hibsga olindi

Moskvaning Zamoskvoretskiy sudi 20 iyun, payshanba kuni Kasblar va malakalarni rivojlantirish agentligi («Vorldskills Rossiya») bosh direktori Robert Urazov va agentlik apparati rahbari Danir Muxametzyanovni ikki oyga hibsga olishga qaror qildi. Ular juda katta miqdordagi firibgarlikda ayblanib, 10 yilgacha ozodlikdan mahrum etilishi mumkin (Rossiya Federatsiyasi Jinoyat kodeksining 159-moddasi 4-qismi).

Agentlik vakillari RBK gazetasiga Urazovning hibsga olingani haqida bilishini hamda «huquqni muhofaza qilish organlari va tergovga yordam berishga tayyorligini» aytdi. Nashr Rossiya hukumatidagi nomi oshkor etilmagan manbasiga tayanib, «Vorldskills Rossiya» kompaniyasiga qarshi moliyaviy audit o‘tkazilgani, unda Ta’lim vazirligi orqali berilgan 300 million rubldan ortiq miqdorda subsidiyalar bo‘yicha da’volar aniqlangani haqida yozadi. 

Kasblar va malakalarni rivojlantirish agentligi Putin tashabbusi bilan tashkil etilgan

Kasblar va ko‘nikmalarni rivojlantirish agentligi 2020 yilda Rossiya prezidenti Vladimir Putinning topshirig‘iga binoan tugatilgan «Yosh mutaxassislar» kasbiy jamoalar va ishchi kuchini rivojlantirish agentligi (World SkillsRussia) bazasida tashkil etilgan. Tuzilma veb-saytida agentlik «kasblarning ilg‘or standartlarini shakllantirish», fuqarolarni qayta tayyorlash va xalqaro loyihalar, jumladan, «professional mahorat chempionatlari»ni o‘tkazish bilan shug‘ullanayotgani aytiladi.

2019 yilda agentlikning hibsga olingan bosh direktori Robert Urazov Budapeshtda bo‘lib o‘tadigan EuroSkills-2018 Yevropa chempionatiga Rossiya professional mahorati milliy terma jamoasini tayyorlashdagi xizmatlari uchun II darajali «Vatan oldidagi xizmatlari uchun» ordeni bilan taqdirlangan.