Slovakiya RF va Ukraina o‘rtasidagi muzokaralar uchun platforma taklif qildi

Slovakiya bosh vaziri Robert Fitso Rossiyaning Ukrainaga qarshi urushini tinch yo‘l bilan hal qilish bo‘yicha o‘z davlati hududida muzokaralar o‘tkazishni taklif qildi, dedi Rossiya prezidenti Vladimir Putin. «O‘tkazilish joyiga kelsak, u (Fitso) agar gap muzokaralar haqida ketsa, o‘z mamlakati bunday muzokaralar olib borish uchun platforma yaratishdan mamnun bo‘lishini aytdi», — dedi Putin 26 dekabr, payshanba kuni Minskda Oliy Yevrosiyo iqtisodiy kengashi sammiti yakunida. 

Kreml rahbarining so‘zlariga ko‘ra, Rossiya bu taklifga rozi. «Ha, biz bunga qarshi emasmiz. Slovakiya bizning nuqtayi nazarimizdan shunday neytral pozitsiyani egallab turibdi». Putinning ta’kidlashicha, Fitso Moskvaga tashrifi chog‘ida «birinchi navbatda Ukraina yo‘nalishida tinchlik kelishuvi haqida gapirgan».

Rossiyalik jurnalistlarning savollariga javob berar ekan, Putin Rossiya urushni tugatishga intilayotganini, ammo 2025 yilda «Maxsus harbiy operatsiyaning barcha vazifalarini hal etishda» davom etishini aytdi.

Zelenskiy: Slovakiya Rossiya gazi uchun suverenitet bilan to‘laydi

Ukraina prezidenti Volodimir Zelenskiy Slovakiya bosh vaziri Robert Fitsoning Moskvaga tashrifi va uning Rossiya prezidenti Vladimir Putin bilan yakkama-yakka muzokaralarini keskin tanqid qildi. «Ta’kidlash joizki, Moskvadagi uchrashuvdan keyin Fitso va Putin qo‘shma bayonotlar bermadi va ommaviy axborot vositalarining savollariga javob bermadilar, ular jamoatchilikning reaksiyasidan qo‘rqishadi », deb yozdi Zelenskiy 23 dekabr kuni X ijtimoiy tarmog‘ida.

Fitsoning bir kun avval bo‘lib o‘tgan tashrifi haqida avvalroq e’lon qilinmadi, uning Putin bilan suhbati tafsilotlari keltirilmadi, biroq bundan oldin Serbiya prezidenti Aleksandr Vuchich bu safar Ukrainaning Rossiya gazining Yevropaga tranzitini davom ettirishdan bosh tortgani bilan bog‘liqligini ma’lum qilgan edi. Ukraina hukumati yaqinda bir necha bor 2025 yil 1 yanvardan boshlab Rossiya gazi va neftining Yevropaga tranzitini to‘xtatishini ma’lum qilgan edi. Shu bilan birga, Kiyev gazni Rossiya Federatsiyasidan bo‘lmasa, boshqa davlatlardan tranzit qilishga tayyorligini ma’lum qildi. Kiyevning Rossiyaning «Gazprom» korporatsiyasi bilan tranzit shartnomasi 2019 yildan beri amal qiladi.

«Moskva Fitsoga sezilarli chegirmalar beradi, ammo Slovakiya ular uchun to‘laydi. Bunday chegirmalar bepul emas — Rossiyaga suverenitet yoki yashirin sxemalar bilan to‘lanadi, bu Slovakiya huquq-tartibot idoralari va razvedka xizmatlarini qiziqtirishi kerak», dedi Zelenskiy.