Хитойнинг GAC автомобилсозлик компанияси (Guangzhou Automobile Group) 2019 йилда Trumpchi (Трампчи) бренди билан АҚШ бозорига чиқишдан бош тортди. Бу эса бренднинг номи – хитойча "чхуанти" (афсона) сўзининг инглизчалаштирилган версияси америкаликларда АҚШ президенти Дональд Трамп (Trump) исмини эслатиб юбориши билан боғланган.
GAC Toyota ва Honda билан бирга Хитой бозори учун автомобиллар ишлаб чиқаради, Trumpchi бренди остида эса 2010 йилдан енгил автомобиллар ва йўлтанламаслар яратади. GAC АҚШда савдоларни 2019 йилда бошлашни режалаштирганди.
Компания маркетологлари АҚШ бозорига чиқишдан олдин Trumpchi брендининг америкаликлар томондан қандай қабул қилинишини ўрганиш мақсадида тадқиқот ўтказишган. Компания раҳбари Юй Цзюннинг айтишича, Trumpchi номи АҚШда компания учун салбий таъсирга эга бўлиши аниқланган. Натижада янги ном топишга қарор қилинган.
Маркетологларнинг хорижий бозорларга чиқишда бундай ўзига хос “нозик” томонларни ҳисобга олмасликлари баъзан англашмовчиликларга ва савдолар муваффақиятсизликка учрашига олиб келади.
Автосаноатда автомобиль маркасининг бошқа тилларда ёқимсиз эшитилиши сабабли ўзгартирилишига ёрқин мисол “Жигули” маркаси билан боғланган. Собиқ иттифоқда бу маркадаги машиналар Лотин Америкасига экспорт қилинмоқчи бўлганда “Жигули” номи “жиголо” сўзини эслатиб юбориши аниқланган ва Lada деб қайта номланган.
Япониянинг Mitsubishi компанияси ҳам Pajerо машинасининг номи испан тилидаги қўпол сўзга ўхшаш янграгани сабабли уни Лотин Америкаси ва Испания бозорларига чиқаришдан аввал Montero деб ўзгартиришга мажбур бўлган.
Ford концерни эса Pinto (испанчада маст, муғомбир сўзини англатади) моделини Corcel’га ўзгартирган.
Toyota эса Францияда MR2 машинасини MR номи билан сотган, чунки машинанинг номи французча merdeux (пасткаш) каби янграган.
GM концерни эса Chevrolet Nova моделини испан тилида сўзлашувчи давлатлар учун Caribe деб ўзгартирган, чунки “no va” испанчада “юрмайдиган” деган маънони беради.
