Собиқ ЭОАВМАнинг собиқ раиси Фирдавс Абдухолиқов ассоциацияни тарк этаётганида ташкилотнинг 2,7 млрд сўмлик қарзи бўлган. Бу ҳақда ассоциациянинг янги раҳбари Шерзодхон Қудратхўжа маълум қилди. Абдухолиқов 19 йил давомида эгаллаб келган лавозимини шу йил феврал ойида, коррупцион можаро ортидан тарк этган эди.
Ўзбекистон электрон оммавий ахборот воситалари миллий ассоциациясига собиқ раис Фирдавс Абдухолиқовдан 2,7 млрд сўмлик қарз “мерос” бўлиб қолган. Бу ҳақда, Qalampir.uz хабарига кўра, ташкилотнинг янги раиси Шерзодхон Қудратхўжа 4 май куни ўтказилган ассоциациянинг ҳисобот йиғилишида маълум қилган.
Тошкентдаги “Hilton” меҳмонхонасида ўтган йиғилишда қатнашган нашр мухбирининг хабар беришича, ташкилотнинг янги раҳбари ассоциация ўз аъзоларидан 2,7 млрд сўм қарздор эканини айтиб, буни ҳал қилиш учун иқтисодий ривожланиш концепцияси ишлаб чиқилаётганини билдирган.
Унинг сўзларига кўра, қарздорликнинг келиб чиқиши шартномаларнинг “бироз нотўғри тузилгани” ва “кераксиз нарсалар”, хусусан техникалар харид қилингани билан боғлиқ.
“Ўша пайтда биз тузган шартномалар бироз нотўғри тузилган. Бизга ҳомийлик қилиб берилмаган, “хизмат кўрсатиш” деб берилган. Кўпчилигини бизга, шахсан менга ёпиш қийин бўляпти. Чунки биздан “отработка”, “счет фактура” сўрайди. Биз унақасига ҳам, бунақасига ҳам ёполмаймиз. Вазирлик, ташкилотлар ҳам белгиланган суммадан бор-йўғи 53 фоизини туширишган, қолган пул тушмаган. Лекин мен биламан, сизлар [бу пуллардан белгиланган] ойликларни бериб, солиқни тўлаб, харажат қилиб бўлгансизлар. Шунинг учун менга озгина вақт берасизлар, мен бу рақамларни жойига қўяман”, дея ассоциация аъзоларидан қарз учун муҳлат сўраган Қудратхўжа.
У, шунингдек, ассоциацияга эски раҳбарият даврида кераксиз техникалар олингани, эндиликда бу техникалар Фирдавс Абдухолиқов раҳбарлигидаги Кинематография агентлигига сотилаётганини айтган.
“Мол-мулкимизда кераксиз нарсалар бор экан. Шуларни сотувга қўйдим. Бизда сайлов пайти олинган жуда катта миқдорда экранлар бор. Уларни сотяпмиз, “Ўзбеккино” сотиб оляпти. Ишлатилган “дорожка”лар, баъзи техникалар бор. Очиғи, менга шуларни сизларга бериш орқали қарздан қутилиш таклифи бўлди. Йўқ, мен уларга ишлатилган “дорожка”, моноблог бермайман, пулини бераман дедим”, деган Шерзодхон Қудратхўжа ва муаммо ечими учун аъзолардан унга бироз вақт беришларини сўраган.
Аввалроқ хабар қилинганидек, мазкур йиғилишда ЭОАВМА номини Ўзбекистон Миллий медиа ассоциацияси деб ўзгартириш тўғрисида қарор қабул қилинди. Ассоциацияга Аброржон Пўлатов бош директор этиб тайинланди.
Ўзбекистон Миллий медиа ассоциацияси – нодавлат-нотижорат ташкилот бўлиб, 18та нодавлат телеканал, 19та радиоканал ва кабел телевидениесига аъзо 100та электрон ОАВни ўз ичига олган.
Ташкилотни 19 йил давомида бошқариб келган Фирдавс Абдухолиқов 2022 йил феврал ойида истеъфо берган, бу унинг давлат амалдори сифатида коррупцион можаро фигурантига айланиши фонида рўй берганди.
Кинематография агентлиги бош директори лавозимини эгаллаб келаётган Абдухолиқов ўз оила аъзоларига тегишли телеканалга миллий сериал суратга олиш бўйича давлат буюртмасини бериб, манфаатлар тўқнашувига оид қонунчиликни бузгани учун суд тартибида маъмурий жаримага тортилган эди.
