Voyager-2 сайёралараро зонди антеннаси йўналиши ўзгариб қолгани боис Ердан буйруқларни қабул қилолмаяпти.
АҚШ Миллий аэронавтика ва фазони тадқиқ қилиш бошқармаси (NASA) Voyager-2 сайёралараро зонд билан алоқа узилиб қолганини эълон қилди.
«21 июль куни NASA томонидан Voyager-2 космик аппаратига юборилган бир қатор буйруқлар жавобсиз қолди. Бунга аппарат антеннасининг Ердан 2 даражага силжиши сабаб бўлди. Оқибатда ҳозир Voyager-2 буйруқларни қабул қила олмайди ва Ерга маълумотларни узата олмайди», дейилади хабарда.
NASA маълумотларига кўра, зонд Ердан 19,9 миллиард км узоқликда учмоқда ва антеннанинг силжиши туфайли Deep Space Network (DSN) ер усти антенналари билан боғлана олмайди.
Ҳисоботда қайд этилишича, Voyager-2 антеннаси йўналишини Ерга мос равишда сақлаб қолиш учун фазодаги йўналишини бир неча марта ўзгартиришга дастурлаштирилган. Навбатдаги ўзгартириш 15 октябрда бўлиб ўтади ва мутахассислар алоқа тикланишини кутмоқда.
Voyager-1 зонди ва унинг «эгизак укаси» Voyager-2 1977 йилда узоқ фазо ва қуёш тизимининг асосий сайёраларини ўрганиш учун учирилган эди. Уларнинг режалаштирилган фаолият муддати аллақачон тугаган бўлса-да, аппаратлар юлдузлараро фазо ҳақида маълумот тўплаш ва Ерга узатишда давом этмоқда.
