Давлат департаменти АҚШ фуқароларини Беларусни зудлик билан тарк этишга чақирди

АҚШ Давлат департаменти Беларусга саёҳат қилишни режалаштираётган америкаликлар учун янгиланган тавсияларни эълон қилди. Бу ҳақда 23 декабр, душанба куни бир қанча Россия ОАВ ёзди. Янги тавсиялар Давлат департаменти веб-сайтида беш кун олдин пайдо бўлган. «Беларус ҳукумати маҳаллий қонунларни ўзбошимчалик билан бажариши ва ҳибсга олиш хавфи, Россиянинг Украинага қарши урушини давом эттириш, минтақадаги беқарорлик ва вазиятни олдиндан айтиб бўлмаслиги сабабли саёҳат қилманг», дейилади хабарда.

Америка расмийларининг тавсияларига кўра, ҳозирда Беларусда бўлган АҚШ фуқаролари дарҳол мамлакатни тарк этишлари керак. Консуллик хизматига муҳтож бўлганлар эса бошқа давлатдаги АҚШ ваколатхонасига мурожаат қилишлари лозим.

Давлат департаменти 2022 йилнинг 28 февралида, Россиянинг Украинага бостириб киришидан тўрт кун ўтиб, америкаликларга мамлакатни тарк этишни биринчи марта тавсия қилганида, АҚШнинг Минскдаги элчихонаси фаолиятини тўхтатди. Кейинчалик, Қўшма Штатлар Беларусга саёҳат қилишнинг мақсадга мувофиқлиги бўйича тавсияларини бир неча бор янгилади. Янги ўзгаришлар мақомни «саёҳат қилмаслик керак» даражасига оширишни ўз ичига олади.

ЕИ Минскка қарши санкцияларни кенгайтирди

ЕИ кенгаши Беларус ҳукумати томонидан президент Александр Лукашенконинг сиёсий мухолифларига нисбатан амалга оширилган репрессиялар билан боғлиқ ҳолда Беларусга қарши санкцияларни кенгайтирди. 16 декабр куни 26 жисмоний ва икки юридик шахсни қора рўйхатга киритиш тўғрисида қарор қабул қилинди, дейилади ЕИ органи сайтида.

Шу жумладан, сиёсий ишлар бўйича айблов ҳукми чиқарган судяларга, «сиёсий маҳбуслар ғайриинсоний шароитларда сақланаётган ва номақбул хатти-ҳаракатларга учраган» қамоқхоналар ва тергов ҳибсхоналари раҳбариятига нисбатан жазо чоралари жорий этилди, дейилади баёнотда.

Бундан ташқари, санкциялар Лукашенко режимидан турли имтиёзлар орқали фойда кўрувчи, шунингдек, ЕИ санкцияларини четлаб ўтишга ёрдам берадиган компаниялар эгалари ва менежерларига жорий этилди. Бошқа нарсалар қаторида, Беларуснинг Европа Иттифоқи билан чегарасида иккита назорат-ўтказиш пунктига эга бўлган ва Лукашенко режимидан сезиларли имтиёз ва афзалликларга эга бўлган «ВЛАТЕ Логистик» транспорт-омбор компанияси ва унинг эгаларига нисбатан чеклов чоралари киритилди.

Режимдан фойда кўрувчи ва Европа Иттифоқи санкцияларини четлаб ўтишга ёрдам берадиган юк ташувчи «Рузэкспедиция» ҳам қора рўйхатга киритилган. Компания Европа Иттифоқидан Беларусга санкциялар орқали тақиқланган автомобилларни етказиб бериш билан шуғулланади.