Черногорияда қўлга тушган криптомагнат АҚШга экстрадиция қилинади

Черногория адлия вазири Боян Божович криптомагнат До Квонни АҚШга экстрадиция қилиш бўйича қарорга имзо чекди. Ушбу қарор криптовалюта соҳасидаги зиддиятли шахслардан бири иштирокидаги юридик можарога ниҳоят нуқта қўймоқда.

Қайд этилишича, вазирнинг қарори Квон томонидан Черногория Олий суди қарори устидан Конституциявий судга киритган шикояти рад этилганидан сўнг қабул қилинган. Сентябр ойида олий суд инстанцияси Terra асосчисини Жанубий Кореяга топшириш имкониятини бекор қилиб, якуний қарорни қабул қилиш ваколатини Адлия вазирлигига топширган эди.

Вазирликнинг расмий баёнотида қайд этилишича, қарор қабул қилишда барча ҳолатлар, жумладан, жиноятнинг оғирлик даражаси, у содир этилган жой, экстрадиция учун сўровларнинг берилиши, Квоннинг фуқаролиги ва уни бошқа мамлакатга топшириш имкониятлари инобатга олинган.

33 ёшли Квоннинг Terraforms Labs компанияси Terra USD (UST) стейблкоинини ишлаб чиққан бўлиб, у Terra токени (LUNA) билан ўзининг алгоритм ва операциялар тизими орқали доллар курсига боғлиқлигини сақлаб туриши керак эди. 2022 йил майда тизим ишдан чиқди, бу вақтда UST ва LUNA токенларининг умумий капитализацияси 60 миллиард доллардан ошганди. Инвесторлар зудлик билан ўз маблағларини чиқариб олишга уриниши натижасида иккала токен нархлари қулади. До Квон лойиҳасининг барбод бўлиши шу қадар кенг кўламли эдики, у глобал криптовалюта бозорига ҳам таъсир кўрсатди.

Кўп ўтмай Жанубий Корея Квонни фирибгарлик ва бозорни манипуляция қилишда айблаб, ҳибсга олишга ордер берди. У ўз айбига иқрор бўлмади ва мамлакатдан қочиб кетди. Бутун дунё бўйлаб инвесторлар миллиардлаб долларларидан айрилди ва Квон Жанубий Корея, АҚШ ҳамда Интерпол томонидан қидирувга берилди.

Ўтган йилнинг мартида До Квон Черногорияда сохта ҳужжатлардан фойдалангани учун қўлга олинди. Жорий йил март ойида эса қамоқдан озод этилгач, у АҚШ ёки Жанубий Кореяга экстрадиция қилинадиган бўлди.

Экстрадиция оид иш Черногорияда сиёсий можарони келтириб чиқарди: собиқ адлия вазири Андрей Милович бош вазир Милойко Спаични Квон билан молиявий алоқалари туфайли Жанубий Кореяга экстрадиция қилиш учун лоббичилик қилишда айблади.

Криптотадбиркорнинг адвокатлари уни Жанубий Кореяга экстрадиция қилишни сўради — ушбу мамлакатда бу турдаги молиявий жиноятлар учун 30-40 йил қамоқ жазоси белгиланган. АҚШда эса суд исботланган ҳар бир жиноят учун алоҳида жазо тайинлаши ва якунда уларнинг умумий муддати бир неча баробарга ошиб кетиши мумкин.