Google делфинлар билан мулоқот қилиш имконини берувчи технологияни ишлаб чиқди

Google компанияси одамларга реал вақт режимида делфинлар билан мулоқот қилиш имконини берадиган технологияни тақдим этди. DolphinGemma номини олган ихтиро сунъий интеллект асосида ишлайди.

Делфинлар сайёрадаги энг ақлли жонзотлардан ҳисобланади. Ёввойи делфинларни ўрганиш лойиҳаси тадқиқотчилари узоқ йиллардан бери уларнинг мураккаб ижтимоий алоқалари устида иш олиб боради. Бу вақт давомида мутахассислар Багам ороллари яқинидаги Атлантика делфинлари тўдасининг кўплаб аудио ва видеоларини тўплашга муваффақ бўлган. Шундан сўнг, тадқиқотчилар товушларни делфинларнинг хатти-ҳаракатларига мослаб чиққан.

Тадқиқотчилар инсон ва делфин ўртасида мулоқот ўрнатиш мумкин деб ҳисоблаб келган, аммо яқин вақтгача денгиз сутэмизувчиларига хос мураккаб товуш ва импусларни тушунишга қодир технологиялар мавжуд эмас эди. Сунъий интеллект пайдо бўлиши билан эса барчаси ўзгарди: DolphinGemma модели содда товушли «луғат» яратишга ёрдам беради — унинг ёрдамида делфинлар билан тил топишиш мумкин.

Янги технология бир-бири билан мулоқот қиладиган делфинларнинг товушларини тушуниш имконини беради. Унинг асосини тил модели (LLM) ташкил этади — Google бундан Gemini тизимида ҳам фойдаланади. DolphinGemma моделининг ҳажми 400 миллионга яқин параметрдан иборат бўлиб, у худди ChatGPT сингари ишлайди: аудиосигналларни олади, уларни таҳлил қилади ва кейинги товуш қайси бўлиши мумкинлиги тўғрисида маълумот беради.

Тажрибанинг биринчи босқичида делфинларни маълум товушлар орқали севимли объектлар билан боғлашга ўргатиш режалаштирилган. Олимлар вақт ўтиши билан делфинлар ушбу сунъий сигналлардан ўйин ўйнаш ёки одам билан мулоқот қилишни истаганида фойдаланишига умид қилмоқда.