Google филм ва телешоулар ишлаб чиқариш бўйича янги бўлинмасини ишга туширди

Google компанияси филмлар ва телешоуларни яратиш бўйича 100 Zeros ташаббусини ишга туширди, деб хабар беради Business Insider.

Янги бўлинма Range Media Partners продюсерлик фирмаси билан ҳамкорликда компания молиялаштириши мумкин бўлган лойиҳаларни қидириш билан шуғулланади.

Google ушбу лойиҳа орқали ўзининг янги хизматларига, жумладан, сунъий интеллект маҳсулотларига эътиборни жалб қилиш ниятида.

Нашрнинг қайд этишича, Google лойиҳа доирасида қаҳрамонлар «айфон» ўрнига Android базасидаги телефонлардан фойдаланишига қарши эмас, аммо интеграция мажбурийдек кўринмаслиги керак.

100 Zeros’нинг биринчи лойиҳаларидан бири «Какку» қўрқинчли филми бўлди — у 2024 йилда чиққан. 100 Zeros логотипи филм бошидаги титрларда пайдо бўлади.

Таъкидланишича, Google YouTubeʼни тайёр филм ва телешоулар учун дистрибютор сифатида кўриб чиқмаяпти.

Компания 100 Zeros ишга тушганини расман эълон қилмаган. Google журналистларнинг сўровларини жавобсиз қолдирган.