Туркия миллати турк бўлган хорижликларнинг ишга жойлашиш шартларини енгиллаштирди

Энди хориж давлатларининг миллати турк фуқаролари рухсатнома олишнинг мураккаб жараёнларидан ўтмасдан Туркияда ишлаши мумкин бўлади.

Фото: Getty images

Туркия президенти Ражаб Тоййиб Эрдўған миллати турк хорижликларни ишга жойлаштириш тартибини соддалаштирувчи фармонни имзолади. Ҳужжат 10 октябр куни эълон қилинди.

Энди хориж давлатларининг миллати турк фуқаролари рухсатнома олишнинг мураккаб жараёнларидан ўтмасдан Туркияда ишлаши мумкин бўлади. Уларга давлат ва хусусий тузилмаларда тадбиркорлик ва касбий фаолият билан шуғулланишга рухсат берилди, армия ва хавфсизлик идораларида хизмат қилиш бундан мустасно.

Фармонга кўра, чет элликлар Туркия фуқаролари билан бир қаторда профессионал бирлашмаларда рўйхатдан ўтиши керак бўлади. Шу билан бирга, яшаш ва ишга жойлашиш учун Туркия фуқаролиги талаби бекор қилинади. Янги қоидалар сайловларда иштирок этиш ва сайланиш ҳуқуқини бермайди.