Зеленский: АҚШ Донбассда демилитаризация қилинган зона таклиф этмоқда

АҚШ, Украина президенти Володимир Зеленскийнинг сўзларига кўра, Украинадаги уруши тўхтатиш бўйича музокаралар доирасида мамлакат шарқида демилитаризация қилинган махсус иқтисодий зона барпо этишни таклиф қилмоқда.

«Улар (АҚШ томони)нинг таклифига кўра, Украина Қуролли кучлари Донецк вилояти ҳудудини тарк этади, яъни, таклиф қилинаётган компромисс шундан иборатки, Россия Қуролли кучлари бу ҳудудга кирмайди», — деди Зеленский пайшанба, 11 декабр куни Киевда журналистлар билан учрашувда.

Зеленскийнинг айтишича, АҚШ фикрига кўра, Россия армияси Донецк, Херсон ва Запорижжя вилоятларидан қўшин чиқаришга мажбур қилинмаслиги мумкин. Шу билан бирга, америкаликларнинг режасига мувофиқ, Россия Днипропетровск, Харкив ва Суми вилоятларидан ўз қўшинларини олиб чиқиши шарт бўлади.

Украина президентининг таъкидлашича, АҚШ билан музокараларда баҳсли бўлиб қолаётган бандлардан бири «Донецк вилояти ҳудуди ва у билан боғлиқ барча масалалар», шунингдек ҳозирча Россия назорати остида турган Запорижжя атом электр станциясининг келажакдаги мақоми ҳисобланади.

«Бу икки масалани биз ҳали ҳам муҳокама қилиб келмоқдамиз», — деди Зеленский.

Украина президенти фикрига кўра, мамлакат ҳудуди билан боғлиқ ҳар қандай компромисс бутун халқ иштирокидаги муҳокамага қўйилиши зарур.

«Менимча, бу саволга украин халқи жавоб бериши керак. Бу сайлов орқалимиди ёки референдум орқалимиди — барибир, украин халқининг позицияси ифода этилиши шарт», — деди у.

Зеленский, шунингдек, АҚШ маъмурияти вакиллари билан Украина учун эҳтимолий Америка хавфсизлик кафолатларини муҳокама этганини маълум қилди. Президентнинг ёзишича, у пайшанба куни X ижтимоий тармоғида (собиқ Twitter) АҚШ томони билан «конструктив ва батафсил суҳбат» ўтказганини қайд этган.

Унинг сўзларига кўра, телефон орқали бўлиб ўтган мулоқотда АҚШ давлат котиби Марко Рубио, мудофаа вазири Пит Ҳегсет, АҚШнинг махсус вакили Стив Уиткофф, шунингдек АҚШ президенти Доналд Трампнинг куёви ва маслаҳатчиси Жаред Кушнер иштирок этган.

«Яқин келажакда хавфсизлик кафолатлари бўйича аниқроқ тушунча пайдо бўлади», — деди Зеленский, бироқ батафсил маълумотларни ошкор этмади.

АҚШ тахминан уч ҳафтача олдин Украинадаги урушига чек қўйиш бўйича ўз режасини тақдим этган эди. Дастлабки вариантни кўпчилик Москва учун ҳаддан ташқари қулай, деб ҳисоблаган. Кейинчалик у Киев ва европалик иттифоқчилар босими остида қайта ишлаб чиқилди.

Киев ва унинг европалик шериклари Украина учун ишончли хавфсизлик кафолатларини ўз ичига олган яна қатор ўзгаришларни талаб қилмоқда.