Зеленский: Эрондаги уруш қурол-яроғ етказиб беришга таъсир қилиши мумкин

Яқин Шарқдаги чўзилган уруш Украинага қурол-яроғ етказиб беришга таъсир қилиши мумкин, деди Украина президенти Володимир Зеленский 2 март, душанба куни WhatsApp чатида журналистлар билан мулоқот пайтида Deutsche Welle (DW) саволларига жавоб бериб.

Зеленскийнинг айтишича, ҳозир Киев ҳамкорлардан қурол-яроғ етказиб бериш ҳажмлари камайганини кузатмаяпти. “Ҳозирча биз бу таъсирни кўрмаяпмиз. Ҳозирча биз умид қилган етказиб беришлар камаймаган, лекин бир суткагина ўтди. Шунинг учун ҳозирча хулоса қилишга эрта”, — деди у.

Шу билан бирга, президент Яқин Шарқдаги можаро чўзилиб кетса, хавф-хатарлар ортиши мумкинлигини тан олди. “Ҳар қандай ҳолатда, агар Яқин Шарқда узоқ давом этадиган жанговар ҳаракатлар бўлса, албатта, бу (қурол-яроғ — таҳр.) етказиб беришга таъсир қилади — мен бунга ишонаман”, — деди Зеленский.

Унинг сўзларига кўра, Украина халқаро вазият мураккаблашган тақдирда ҳам ўз мудофаа ишлаб чиқаришини барқарор молиялаштиришни таъминлаш устида ишлаяпти. “Биз ҳамма нарсани қиламизки, ўзимиздаги ишлаб чиқаришни молиялаштириш тўхтаб қолмасин, шунда у тўлиқ қувватда ишлайди. Бугун биз айнан шу устида ишлаяпмиз — 90 млрд евро блокланиб қолмаслиги учун”, — деди президент, Европа Иттифоқининг (ЕИ) Украинага ёрдамини назарда тутиб.

DW саволига жавоб бериб, Зеленский Эрондаги уруш Россияга ва шахсан президент Владимир Путинга нисбатан сиёсий ҳамда имиж оқибатларига олиб келиши мумкин, деган фикрни ҳам билдирди. “Менимча, Путин Сурияда қандай ‘иттифоқчи’ эканини аллақачон кўрсатган — улар аслида Асад режимига ёрдам бера олмаган. Худди шу тарзда, менимча, улар ҳозир ҳам ўз заифлигини намоён қилди, яъни иттифоқчи сифатида”, — деди Зеленский.

Унинг фикрича, Россиянинг минтақада таъсири чекланганининг асосий сабаби — унинг барча ҳарбий ресурслари Украинадаги урушга йўналтирилгани. “Уларнинг барча кучлари, барча қуролли кучлари ва бошқа тузилмалари — ҳаммаси Украинада. Уларда бошқа куч йўқ”, — дея таъкидлади у.

Зеленскийнинг ҳисоблашича, Эрондаги уруш Россия президенти учун сигнал бўлиши керак. “Эронда бўлаётган воқеалар менга кўра — Путин учун диктатура нималар билан тугашини кўриб қўйишга яхши сигнал”, — деди у.

Зеленский DW саволига жавобан, Хитой Украинани урушни тўхтатиш бўйича музокараларда воситачи сифатида қатнашишни таклиф қилган-қилмагани ҳақида ҳам гапирди. Президентнинг айтишича, Киев Пекиннинг жараёнга жалб этилишига манфаатдор.

“Биз учун уларни урушга эмас, айнан Путин Украинага олиб келган урушни тўхтатишга жалб қилиш муҳим. Менимча, бу уларнинг қўлидан келади. Ҳар қандай ҳолатда, айрим турдаги қурол-яроғ, икки хил мақсадли товарлар ва ҳоказолар етказиб берилишига — буларнинг барчасига Хитой раҳбари таъсир кўрсатиши мумкин. Биз учун уларнинг иштироки аниқки, ёмон бўлмасди. Ҳозирча эса биз уларнинг бундай жалб этилганини кўрмаяпмиз”, — деди Зеленский.

Унинг сўзларига кўра, Украина мавзуси яқинда халқаро ҳамкорлар билан бўлган алоқаларда ҳам кўтарилган, хусусан, 2 март куни Германия канцлери Фридрих Мерц билан суҳбатда. У феврал охирида Хитойга ташриф буюргани ҳақида айтган. “Менда Мерц билан яхши суҳбат бўлди. Мен учун унинг Хитойга сафари тафсилотлари муҳим эди. У Украина масалаларини кўтарган, бу ҳақда Хитой раҳбари билан гаплашган”, — деди Зеленский. Президент қўшимча қилишича, у украин дипломатларига Хитой томони билан алоқани сақлашни топширган.