АҚШ вице-президенти Жо Байден ва Туркия бош вазири Аҳмад Довудўғли телефон орқали суҳбатда ИШИД террористик гуруҳига қарши кураш ҳамда Ироқ ҳудудига турк қўшинларининг киритилиши сабабли вужудга келган икки давлат ўртасидаги кескинлик масалаларини муҳокама қилишди. Бу ҳақда Оқ уй хабар қилди.

“Етакчилар Ироқдаги ҳодисаларни муҳокама қилиб, Ироқ суверенитетига ҳурмат руҳида Туркия ва Ироқ ҳукуматлари ўртасидаги кескинликни бартараф этиш ҳамда ИШИДга қарши кураш бўйича коалициянинг умумий кучларини мувофиқлаштириш лозимлигини таъкидлашди”, - дейилади Қўшма Штатлар президенти маъмуриятининг хабарида.

Бундан аввалроқ эса Туркия президенти Ражаб Тойиб Эрдўғон турк ҳарбийларининг Ироқ ҳудудидан олиб чиқилиши тўғрисида гап ҳам бўлиши мумкин эмаслигини айтиб ўтган эди.