Toshkentda 9 va 13-tramvaylar harakati 22 apreldan to‘xtatiladi

22 aprel kunidan boshlab Toshkent shahridagi tramvay yo‘nalishlari soni 2ta qoladi. Uz24 saytining «Toshshahartransxizmat»ga asoslanib xabar berishicha, Toshkent shahridagi 9- va 13-tramvay yo‘nalishlari faoliyati 22 apreldan butunlay to‘xtatiladi.

Ushbu yo‘nalishlarni tugatish haqidagi buyruq bugun, 21 aprel kuni chiqarilgan.

17- va 8-tramvaylar faoliyati taxminan 1 iyunga qadar davom etishi aytilgan.

Manbaning ma'lumotiga ko‘ra, tramvay depolari xizmatchilari qayta tayyorgarlikdan o‘tib, Toshkent metropolitenida yoki «Toshshahartransxizmat»ning boshqa bo‘linmalarida ish bilan ta'minlanishi ko‘zda tutilgan.

Toshkent shahri hokimiyati Toshkent shahridagi 6ta tramvay yo‘nalishlari faoliyati to‘xtatilishi haqida mart oyi oxirida ma'lum qilgandi.

12 aprel kuni Toshkent shahrida №12 yo‘nalishi («Beshqayrog‘och» dahasidan «Beruniy» metrosigacha) va №26 yo‘nalishi («Qo‘yliq-6» dan «Toshkent» vokzaligacha) bo‘yicha harakatlanadigan tramvaylar harakati to‘xtatildi. Natijada, shaharda faqat 4ta tramvay yo‘nalishi qoldi.

Keyinroq 20 apreldan boshlab 9-raqamli («Toshkent» vokzali — «Chilonzor-26» dahasi) va 13-raqamli («Toshkent» vokzali — «Qo‘yliq markazi») yo‘nalishdagi tramvaylar harakatlanishdan to‘xtashi haqida xabar berildi.

Ammo bu xabar amalda isbotini topmadi — 20 aprel kuni tramvaylar qatnovni davom ettirdi.

Shu tariqa, shaharda 115 yildan buyon harakatlanib kelayotgan tramvaylar 2010 yilning bahorida yopilgan trolleybuslar ortidan tarixga aylanmoqda. Buning sababi sifatida ularning jamoat transportining boshqa turlariga nisbatan «samarasiz» ekanligi keltirilgan.

Shu oydan boshlab tramvaylar harakatlangan yo‘nalishlarda mos ravishda T8, T9, T13 kabi avtobuslar harakati yo‘lga qo‘yildi. Bu yo‘nalishlarda Isuzu avtobuslaridan foydalanilmoqda. Sentyabr oyi oxirigacha shahar hokimiyati 80ta shunday avtobuslar sotib olib, har bir yo‘nalishga 10tadan 18tagacha avtoulov qo‘yishni rejalashtirgan.