Бугун Колумбия ҳудудида, Медельин шаҳри яқинида бортида 22 нафар футболчи ҳам бўлган йўловчи самолёт авиаҳалокатга учради. Самолёт бортида Бразилиянинг «Шапекоэнсе» жамоаси футболчилари ҳам бўлган. Улар Медельинга Копа Судамерикана мусобақасида «Атлетико Насьональ»га қарши 1 декабрда ўтказилиши лозим бўлган учрашувга учиб кетаётганди.

20 жамоа иштирок этадиган Бразилия А сериясида 37-турдан кейин 9-ўринни эгаллаб турган «Шапекоэнсе» жамоаси Жанубий Америка минтақаси клублари ўртасидаги Копа Либертадорес турниридан кейин нуфузи жиҳатдан иккинчи ўринда турадиган Копа Судамерикано мусобақаси финалига чиққанди.

Бортда жами 81 киши бўлган: 72 йўловчи (48 киши клуб делегацияси вакиллари ва 21 нафар журналист) ва экипажнинг 9 нафар аъзоси.

Колумбиядаги самолёт ҳалокати ҳудудида олинган суратлар тарқалди

Омон қолганлар: 5 киши, жумладан 3 футболчи, бир массажчи ҳамда стюардесса омон қолган. Улар айни вақтда шифохонага етказилган.

Маҳаллий полиция 75 киши ҳалок бўлганини тасдиқлади.

Дастлаб  омон қолган футболчилар  «Шапекоэнсе» ҳимоячиси Алан Рушел ва ярим ҳимоячи Жексон Фолльманн экани айтилди.

Кейинчалик дарвозабон Маркос Данило Падилье ҳам тирик қолгани маълум бўлди.

Lamia авиакомпанияси самолёти ҳалокатдан олдин фавқулодда вазият ҳақида ердагиларни огоҳлантирган: электр жиҳозлар ишдан чиққанди. Самолёт Медельин шаҳри яқинида, аэропортга 50 километр масофа қолганида қулаган. Қулашдан олдин портлаш рўй бермагани баъзи йўловчиларнинг омон қолишига сабаб бўлди.

«Шапекоэнсе» авиаҳалокатга учрагани сабабли Жанубий Америкада халқаро ўйинлар бекор қилинди

«Шапекоэнсе» жамоаси ўрта сиғимли BAe 146 самолётида учганди. Айнан шу самолётдан бир ой олдин Аргентина терма жамоаси ва Лионель Месси фойдаланганди.

Ҳалокат вақтида ҳаво шароитлари ҳам яхши бўлмаган: кучли шамол ва довул кузатилган. Об-ҳаво шароити ва ҳалокат тоғли ҳудудда рўй бергани қутқарувчиларнинг ишларини қийинлаштирган.

«Шапекоэнсе» Бразилия чемпионатида 2014 йилдан буён иштирок этиб келмоқда. 10 йил олдин жамоа банкрот ёқасига келган, аммо 2009 йилда бир гуруҳ тадбиркорлар ташаббуси билан жамоа сақлаб қолинди. Тўпланган маблағнинг 30 фоизи клуб қарзларини тўлаш учун сарфланди (тахминан ярим миллион доллар), 70 фоизи клубни қайта қуриш учун йўналтирилган.

Ўша вақтда «Шапекоэнсе» D сериясида иштирок этарди. Бир йил ўтибоқ жамоа учинчи дивизионга кўтарилди, кейинги йилда эса B серияга. Тўртинчи лигадан Копа Судамерикана финалигача йўл 7 йилда босиб ўтилганди.

«Шапекоэнсе» жамоаси муваффақияти молиявий ташкилотчиликнинг тўғри йўлга қўйилгани билан боғлиқ. Клуб хусусий компания томонидан бошқарилади. «Шапекоэнсе» Бразилия чемпионатидаги маошлар энг юқори бўлган жамоа эди – ойига 90 минг бразил реали (26,5 минг доллар).

«Шапекоэнсе»нинг 9 футболчиси жароҳат туфайли самолётга чиқмаганди

Ўтган йилда «Шапекоэнсе» халқаро турнирда илк марта иштирок этди ва Копа Судамерикана турнирининг чорак финалига қадар етиб бориб, «Ривер Плейт»га ютқазди (1:3, 2:1). 5 кун олдин жамоа Аргентинанинг «Сан-Лоренсо» жамоаси тўсиғидан ўтиб, турнир финали йўлланмасини нишонлаганди.

Копа Судамерикана турнирининг иккинчи финали 7 декабрга белгиланганди. «Шапекоэнсе» ихчамгина стадионга эга (22 минг томошабин), шу туфайли ўйин бошқа штатга – Куритибу штатига кўчирилганди. Бу ерда 40 минг кишилик арена бор.

Лекин бу ўйин энди бўлмайди.

Жамоанинг аэропортда парвозга чиқиш олдидан олинган охирги видеоси.

Футболчилар парвоз арафасида учувчи билан селфи тушди.

«Пахтакор» «Шапекоэнсе»га ҳамдардлик билдирди