АҚШ Демократик партияси интернет-ресурсларига хакерлик ҳужумига гўёки Москва алоқадор эканлигини айтиб келаётган, АҚШнинг кетаётган президенти Барак Обама ўз сўзларини ёки исбот билан асослаши, ёки "бўҳтон қилишни" бас қилиши керак, деб айтилди Дональд Трамп жамоасида.

Амалдаги АҚШ маъмуриятининг "рус хакерлари" мавзусидаги чайқовчиликларини 20 январдан Оқ уй ходимлари аппаратини эгаллайдиган Райнс Прибэс ва Трампнинг маслаҳатчиси Келлиэнн Конуэй танқид қилдилар.

Прибэснинг айтишича, демократлар "америка халқи билан буткул алоқани йўқотганлар" ва сайловлардаги мағлубиятларидан шунчалик "карахт" ҳолдаларки, ҳанузгача "бунга ишона олмаяптилар".

Прибэс Россия АҚШдаги сайлов жараёнига қандайдир йўл билан таъсир қилгани ҳақидаги тахминларни қатъиян рад этмоқда ва бу бўҳтонлардан ягона мақсад "сайлов натижаларини чиппакка чиқаришдан иборатдир", деб айтмоқда. Бу ҳақда ТАСС ахборот агентлиги хабар бермоқда. 

Прибэснинг айтишича, Трамп "кўплаб одамлар турли нарсаларни айтаётганда эмас", балки АҚШ махсус хизматлари "ҳақиқатан ҳам бунга бирор асос келтирса", тегишли хулосалар чиқаради. Трампнинг фикрича, АҚШ разведкаси идоралари "бу ҳодиса қаерда, қандай қилиб, қачон юз бергани борасида ўз хулосаларида очиқ ва шаффоф бўлмаганлар". Прибэснинг тахминича, охир-оқибат махсус хизматлар қандайдир тўхтамга келишади ва ўшанда "янги президентнинг бу ҳақдаги фикрини билиш мумкин бўлади".

Шу билан бирга Прибэс Россия ва Трамп ҳамда унинг атрофидагилар АҚШ президентлик сайловларида Хиллари Клинтон ғалаба қозонмаслиги учун ўз ҳаракатларини қандайдир йўл билан мувофиқлаштиришгани ҳақидаги тахминни қатъиян рад этди. "Саволнинг қўйилишининг ўзи аҳмоқонадир. Албатта, биз россияликлар билан бирга ҳаракат қилмаганмиз. Бу барча назариялар ахборотнинг маълум усулда аниқ мақсадларда берилиши натижасидир", деб таъкидлаб ўтди Прибэс.

Прибэснинг фикрича, "демократлар кўзгуга қараб, сайловларни ютқазганларидан иборат ҳақиқатни тан олишлари керак". Унинг фикрича, бу мағлубият "демократлар америка халқи билан алоқани буткул йўқотганлари" сабабли юз берган.

Прибэснинг айтишича, демократлар Трампнинг ғалабасини қабул қилиш ўрнига, бир қатор штатларда овозларни қайта ҳисоблашни бошлашди ва бу ҳеч қандай натижага олиб келмагач, "сайловчилар ҳайъати аъзоларини қўрқитишга уринишни" бошлашган. Улар 19 декабрда Трампнинг президентлиги бўйича якуний қарорни чиқаришади.

Трамп АҚШ президенти бўлиши учун сайловчилар ҳайъати аъзоларининг камида 270 овозини тўплаши керак. Трамп сайловлар давомида 306 овоз, Клинтон эса 232 овоз тўплаган. 

Прибэс ўз сўзлари якунида демократларнинг барча уринишлари ҳеч қандай натижага олиб келмаслигига ишончи комиллигини айтган. 

Декабрь бошида 7 нафар америкалик сенатор Обамага Россиянинг АҚШдаги сайловларга таъсир қилган бўлиши мумкинлиги ҳақидаги маълумотларни агар улар ҳақиқатан мавжуд бўлса, ошкор қилишни таклиф қилишганди.