Перу жануби-шарқида автобуснинг жарга тушиб кетиши оқибатида ҳалок бўлганлар сони 12 кишигача ошди, деб маълум қилди полиция бошқармаси раҳбари, генерал Висенте Ромеро. 

Аввал 7 киши ҳалок бўлгани маълум қилинганди. Генералнинг айтишича, полициячилар кетаётган автобус тоғ йўлидан чиқиб кетиб, 700-800 метрлик чуқурликдаги жарга тушиб кетган.    

Автобусда 30 дан кўпроқ полициячи Антабамба вилоятида автомобиль йўллари қурилиши ва таъмирланишини талаб қилаётган маҳаллий аҳоли билан низони тартибга солишга уринаётган амалдорлар хавфсизлигини таъминлаш учун вилоятга кетаётган бўлганлар.

"Франс Пресс" ахборот агентлиги маълумотларига кўра, фожеа оқибатида 13 киши жароҳат олган, улардан 6 нафарининг аҳволи оғир.