АҚШнинг сайланган президенти Дональд Трамп Россияни Қўшма Штатлар миллий хавфсизлигига раҳна солувчи асосий таҳдидлар рўйхатидан олиб ташлади, деб ёзмоқда Foreign Policy (FP) Трамп жамоасидаги манбасига таянган ҳолда. 

Мазкур таҳдидлар АҚШ мудофаа вазири ўринбосари Брайан Маккеон томонидан тайёрланган таҳлилий эслатмада қайд этилган. Бу эслатма, сайланган президентнинг ўтиш жамоаси вакили Мира Рикардель томонидан тақдим этилган ва Трамп муаллифлигидаги эслатма асосида тузиб чиқилган. 

Нашрга кўра, Трамп маъмуриятининг мудофаа сиёсатидаги асосий эътибор қаратадиган жиҳатлари ИШИДга қарши кураш, Хитой ва КХДР ҳаракатларини доимий назорат қилиш, АҚШ Қуролли кучларини модернизация қилиш, уларни молиялаштиришдаги чекловларни олиб ташлаш, киберхуружларга қарши ҳаракат қилиш ва Пентагоннинг янада самаралироқ фаолиятини таъминлашдан иборат бўлади. 

Трамп маъмуриятидаги манба Россиянинг АҚШ хавфсизлигига асосий таҳдидлар рўйхатида бор-йўқлигини изоҳламаган ҳамда таҳлилий эслатма «якуний ҳужжат эмаслигини», балки тўлдирилишини таъкидлаган. 

Барак Обама бир неча маротаба, ҳатто, БМТ Бош ассамблеяси сессиясида ҳам, Россияни ИШИДдан сўнг, АҚШ учун энг катта таҳдид сифатида баҳолаган эди.