2016 йил 27-28 декабрь кунлари Душанбе шаҳрида Ўзбекистон Республикаси билан Тожикистон Республикаси ўртасида савдо-иқтисодий ҳамкорлик бўйича ҳукуматлараро комиссиянинг тўртинчи мажлиси бўлиб ўтди. Унда бир қатор келишувлар имзоланди.

Хусусан, Ўзбекистон ва Тожикистон делегациялари икки давлат ўртасида авиапарвозларни тиклаш ҳақидаги протоколни имзолашди, деб хабар берди РИА Новости Душанбедаги элчи Шоқосим Шоисломовга асосан.

«Хусусан, икки давлат пойтахтлари ўртасида 2017 йилнинг биринчи ярмида авиапарвозларни тиклаш ҳақидаги протокол имзоланди. Шунингдек, ўзбек саноатчилари алюминий хом ашёсини харид қилишади», - дея маълум қилган у.

Эслатиб ўтамиз, аввалроқ Душанбе-Тошкент-Душанбе авиарейслари йўловчилари визаларни аэропортларнинг ўзида олишлари мумкинлиги хабар қилинганди.

Икки мамлакатнинг тегишли вазирлик ва идораларига йўловчи автобуслари ва поездлар қатновини тиклаш ҳақидаги келишув лойиҳасини тайёрлаш вазифаси юклатилган.

Бундан ташқари, темир йўл ўтказмаларида камайтирувчи коэффициент ҳақида, шунингдек Тожикистонга маҳсулот етказиб бериш борасида ҳам протоколлар имзоланди.

Савдо-иқтисодий ҳамкорлик бўйича ҳукуматлараро комиссиянинг навбатдаги мажлиси 2017 йил Тошкент шаҳрида ўтказиладиган бўлди. Таъкидланишича, Тожикистон президенти Эмомали Раҳмоннинг Ўзбекистон бош вазирининг ўринбосари Рустам Азимов билан учрашувида Тожикистон раҳбари Ўзбекистон Республикаси Президенти Шавкат Мирзиёевни ўзи учун қулай вақтда Тожикистон Республикасига расмий ташриф билан келиш таклиф этилган мактубини топширди.

«Йиғилиш якунлари томонлар икки давлат ўртасидаги муносабатларга катта эътибор беришидан далолат берди. Ўзбек-тожик муносабатлари доимо алоқаларни мустаҳкамлаш ва дўстлик муносабатларини янада кенгайтириш билан ажралиб турган», - дейилади якуний материалда.