Америка махсус хизматлари ва Жанубий Корея қуролли кучлари ҳамкорлигида махсус бўлинма ташкил этилади. Бу отряд КХДР билан уруш келиб чиққан ҳолда шимолликлар етакчиси Ким Чен Инни ўлдириш учун тузилади. Бу ҳақда Ёнҳап агентлиги Сеулдаги ҳарбий манбасига асосланиб хабар тарқатган.

Бундай ҳарбий бригада шу йилнинг ўзида тайёр бўлиши режалаштирилган. Бу отряд таркиби 2 минг кишигача етиши мумкин. Отряддаги америкалик ҳарбийлар Жанубий Корея қўмондонлиги кўрсатмалари асосида ҳаракат қилади.

Яқин ойлар ичида Сеул ва Вашингтон воқеаларнинг эҳтимолий сценарийлари бўйича бир қанча қўшма машғулотлар ўтказишни режалаштирган. Тузилажак отряднинг вазифаси нафақат Ким Чен Инни, балки шимолликларнинг ҳарбий ва сиёсий раҳбариятини ҳам буткул йўқ қилиш ҳисобланади.

Шимолий Корея етакчисини йўқ қилиш ғояси илк бор сентябрь ойида Пхеньян ўз тарихидаги энг улкан ядровий синовни ўтказганидан кейин пайдо бўлганди. Бу синовдаги портлаш кучи 1945 йилда Хиросимага ташланган бомба кучидан кучлироқ эди.

Бундан олдинроқ Шимолий Корея агар АҚШ ва унинг иттифоқдошлари Пхеньянга таҳдид қилишни ва минтақада ҳарбий машғулотлар ўтказишни давом эттирсалар, уларга ядровий зарба бериш имкониятини кўпроқ оширишни давом эттириши ҳақида хабар берилганди.