AQSh va Janubiy Koreya Kim Chen Inni yo‘q qilish uchun maxsus otryad tuzadi

Amerika maxsus xizmatlari va Janubiy Koreya qurolli kuchlari hamkorligida maxsus bo‘linma tashkil etiladi. Bu otryad KXDR bilan urush kelib chiqqan holda shimolliklar yetakchisi Kim Chen Inni o‘ldirish uchun tuziladi. Bu haqda Yonhap agentligi Seuldagi harbiy manbasiga asoslanib xabar tarqatgan.

Bunday harbiy brigada shu yilning o‘zida tayyor bo‘lishi rejalashtirilgan. Bu otryad tarkibi 2 ming kishigacha yetishi mumkin. Otryaddagi amerikalik harbiylar Janubiy Koreya qo‘mondonligi ko‘rsatmalari asosida harakat qiladi.

Yaqin oylar ichida Seul va Vashington voqealarning ehtimoliy ssenariylari bo‘yicha bir qancha qo‘shma mashg‘ulotlar o‘tkazishni rejalashtirgan. Tuzilajak otryadning vazifasi nafaqat Kim Chen Inni, balki shimolliklarning harbiy va siyosiy rahbariyatini ham butkul yo‘q qilish hisoblanadi.

Shimoliy Koreya yetakchisini yo‘q qilish g‘oyasi ilk bor sentabr oyida Pxenyan o‘z tarixidagi eng ulkan yadroviy sinovni o‘tkazganidan keyin paydo bo‘lgandi. Bu sinovdagi portlash kuchi 1945 yilda Xirosimaga tashlangan bomba kuchidan kuchliroq edi.

Bundan oldinroq Shimoliy Koreya agar AQSh va uning ittifoqdoshlari Pxenyanga tahdid qilishni va mintaqada harbiy mashg‘ulotlar o‘tkazishni davom ettirsalar, ularga yadroviy zarba berish imkoniyatini ko‘proq oshirishni davom ettirishi haqida xabar berilgandi.