Қирғизистон давлат қарзи 4 млрд доллардан ошди

Иқтисодиёт 13 Январь 2017 10207

Қирғизистон республикаси давлат қарзи 4,075 млрд долларга етди, деб хабар қилмоқда мамлакат молия вазирлиги.

"Расмий маълумотларга кўра, бугунги кунга келиб, ташқи қарз қарийб 3,765 млрд долларни, ичкиси салкам 310 млн долларни ташкил этади", - дейилади вазирлик хабарида. 

Молия вазирлигининг қайд этишича, республиканинг давлат қарзлари белгиланган муддатда қатъий равишда адо этилади. "Ўтган йили қарз тўлашга 20,75 млрд сом (299 млн доллар) сарфланган. 2015 йил билан қиёслаганда, қарзни тўлаш учун харажатлар 44 фоизга ошган", - дея маълум қилинган ҳисоботда. 

Қирғизистон давлат қарзининг асосий қисмини хорижий кредитлар ташкил этади. Республика биргина Хитойнинг турли молиявий тузилмаларидан мустақиллик йилларида 2,086 млрд доллар миқдорида қарз олган. Уларнинг аксариятини йўллар қуриш ва энергетика соҳасини ривожлантиришга сарф этиб бўлган. 

Бунда, Қирғизистон молия вазирлигининг ишонтиришича, мамлакат давлат қарзи "рухсат берилган лимит" доирасидадир. Республика қонунчилигига кўра, мамлакат ташқи қарзи ЯИМнинг 60 фоизидан ошмаслиги керак. 

Бугунги кунда миллий валютанинг долларга нисбатан расмий курси 69,48 сомни ташкил этади. Бироқ, алмаштириш бюролари ва тижорат банклари АҚШ долларини  69,7-69,75 сомдан сотишади.

Кўпроқ янгиликлар