Австрия президенти Александр Ван дер Беллен америкалик ҳамкасби Дональд Трампнинг баъзи мусулмон мамлакатлар фуқароларининг АҚШга киришини тақиқловчи фармони миллатчилик экани ва унинг "ҳаваскорларча" қабул қилинганини айтди. У Standard нашрига берган интервьюсида шунга тўхталиб ўтди. 

"Аёнки, мутлақо ҳаваскорларча қабул қилинган ва амалга оширилган мазкур фармон - камситишдан бошқа нарса эмас. Мен бундан аввал Дональд Трампнинг сайлов олди кампанияси услуби ва мазмунини танқид қилганман", - деди Ван дер Беллен. 

Шунингдек Австрия президентининг фикрича, АҚШнинг янги раҳбарияти сиёсатидан ёлғиз у хавотирда эмас. 

"Масала шундаки, биз, европаликлар нима қила оламиз? Бу беихтиёр Евроиттифоққа ташвишли сигнал бўлиши мумкин. Биз шу йўналишда ҳаракатланишни истаймизми? ЕИ мамлакатлари XX асрда кўплаб бало-қазоларга сабаб бўлган миллатчилик - боши берк кўча эканлигини тушуниб етишга тайёрми?", - деди Австрия президенти.