9 февраль куни Россия Ҳарбий-космик кучлари томонидан Суриянинг Ал-Боб шаҳри яқинида жойлашган бинони бомбардимон қилишининг эҳтимолий сабаби айтилди. Бу ҳақда «Коммерсантъ» Россия ҳарбий бошқарув органларидаги манбасига асосланган ҳолда хабар тарқатган.

Нашр суҳбатдошининг сўзларига кўра, ҳодиса сабабларидан бири Россия зарба берадиган ҳудуддан туркиялик ҳарбийларнинг ўз вақтида кўчирилмагани бўлиши мумкин. Нашрнинг қайд этишича, координаталар олдинроқ Россия ва Туркия бош штаблари ҳамда авиагуруҳлар томонидан келишиб олинганди.

Амалиётда Россия ҲККнинг Су-24М ва Су-34 бомбардимончи самолётлари, шунингдек Су-25СМ штурмовиклари иштирок этган. Ушбу самолётлар учувчилари тажрибали учувчилар бўлиб, улар бундан аввалроқ Туркия Ҳарбий ҳаво кучлари самолётлари билан қўшма амалиётларда ҳам иштирок этганди.

9 февраль куни тонгида самолётлар Хмеймим авиабазасидан ҳавога кўтарилган, соат 08:40да Ал-Боб яқинидаги ҳудудда нишонга бомбалар ташланган. Рўй берган ҳодиса авиациянинг Латақияга қайтишидан кейин маълум бўлган.

9 февраль кунининг иккинчи ярмида Туркия Бош штаби, Россия самолётлари ҳужуми оқибатида 3 нафар турк аскари ҳалок бўлиб, 11 нафари жароҳатланганини маълум қилди.

Бу маълумотни Россия Мудофаа вазирлиги ҳам тасдиқлади ва бу ҳужум хатолик туфайли рўй берганини таъкидлади. Кремлдагилар ҳодисага мувофиқликда ҳаракат қилинмагани сабаб бўлгани ҳақида айтишди.

Ушбу ҳодисадан кейин Россия президенти Владимир Путин ва Туркия раҳбари Ражаб Тойиб Эрдўған ўртасида телефон мулоқоти ўтказилди. Россия раҳбари ҳамдарлик билдирди, томонлар Сурияда ИШИДга қарши ҳаракатларни мувофиқлаштириш масаласида келишиб олди.