20 февраль куни амалга оширилиши керак бўлган, аммо Somon Air авиакомпанияси айби билан амалга ошмаган, 3 кун кечикиб, бугун, 23 февраль куни, соат 13:00да амалга оширилиши айтилган Душанбе-Тошкент рейси яна қолдирилган. Айни вақтда Somon Air авиакомпанияси матбуот хизмати бунга изоҳ бермаяпти.

Шунингдек, Душанбе аэропортида ҳам бу рейс амалга ошмаётганининг сабабини тушунтириб бера олишмаяпти.

«Рейс бугунги жадвалда эди, биз бу рейс йўловчиларига хизмат кўрсатишга тайёрланаётган эдик. Аммо нима учун рейс қолдирилганини билмаймиз», - дея Душанбе аэропорти матубот хизмати котиби Жамила Ҳусейнованинг сўзларини келтирган Asia-Plus.

Келишув фақат сўзда эдими?
25 йилдан буён кутилаётган илк Душанбе-Тошкент рейси 20 февраль куни амалга оширилиши лозим эди. Лекин Тошкент Халқаро аэропорти Тожикистон авиакомпаниясига парвозни амалга оширишга рухсат бермаганди. Бунга Душанбе томони баъзи ҳужжатларни Тошкентга юбормагани сабаб бўлди. Шундан сўнг, Somon Air авиакомпаниясининг ушбу ҳолат учун жавобгар тижорат директори Алишер Рустамов бошчилигидаги барча масъул шахслар жазоланди ва ишдан бўшатилди.

Маълум бўлишича, Тошкентга юборилган сўровда доимий рейслар учун эмас, чартер рейслар назарда тутилганди, қолаверса сўров якшанба куни, 19 февралда, парвоз кунига бир кун қолганида юборилган.

Бундан ташқари, Тошкентда ҳануз Somon Air авиакомпанияси ваколатхонаси очилмаган, Ўзбекистонда чипталар сотилиши йўлга қўйилмаган.

Somon Air сукут сақламоқда
Somon Air авиакомпанияси айбдорлигини тан олди, аммо саволларга жавоб берилмади.

«Сомон Эйр» раҳбариятининг вазият бўйича синчковлик билан ўтказган текширувларидан кейин аниқландики, ҳужжатлар пакети авиакомпания томонидан Ўзбекистонга ўз вақтида юборилмаган. Бу вазият учун жавобгар бўлган барча шахслар, хусусан, тижорат ишлари бўйича директор Алишер Рустамов жазоланди ва ишдан четлатилди.

Айни вақтда икки авиакомпания ўртасида жараённинг техник жиҳатлари ҳал қилинмоқда. Душанбе - Тошкент - Душанбе йўналишидаги парвозлар яқин вақтлар ичида амалга оширилиши керак.

Авиакомпания 20 февраль куни  Душанбе - Тошкент рейси учун чипта олган йўловчилардан ва Ўзбекистондаги ҳамкорлардан келтирилган ноқулайлик учун узр сўрайди», дейилган авиакомпания пресс-релизида.

Саволлар очиқ қолмоқда
Масалан, нима учун ҳужжатлар ўз вақтида эмас, рейс 20 февраль куни амалга оширилиши 1 ойдан буён маълум бўлгани ҳолда, 19 февраль куни юборилган? Нима учун ҳалигача Тошкентда ваколатхона очилмаган? Бунинг учун ҳам етарлича вақт бўлганди. Нима учун авиакомпания доимий рейслар ҳақида гапирган, ҳолбуки гап бу ҳақида кетмаган бўлса?

Авиакомпания юқорида келтирилган саволларни ҳал қилмасдан туриб, «яқин вақтлар ичида» рейсни амалга оширадими?

Asia-Plus хабарига кўра, Душанбедан рейслар доимий рейслар бўлмайди.

Бу тушунарсиз вазиятга изоҳ сўралиб, тегишли ташкилотларга, хусусан Тожикистон транспорт вазирлиги ҳамда Фуқаролик авиацияси бошқармасига мурожаат қилинган, лекин ҳеч қандай жавоб бўлмаган.

Узоқ кутилган «Душанбе — Тошкент» рейси амалга ошмади. Сабаб?