Ўзбекистонда интернет тезлиги ва бу борада провайдерлик хизматларини ташкил этувчилар, уларнинг кўрсатаётган хизмат сифатлари борасида муаммолар борлиги ҳеч кимга сир эмас. «Потребители.Uz» сайти Ўзбекистонда қайси интернет провайдерлар хизмати истеъмолчиларнинг бирмунча бўлса-да эътирофига сазоворлигига қизиқиб кўрди ҳамда Ўзбекистондаги интернет-провайдерларининг ўзига хос рейтингини тузиб чиқди. 

Рейтингни тузишда 2016 йил январидан 2017 йил февралига қадар Facebook ижтимоий тармоғидаги «Потребитель.уз» гуруҳида қайд этилган сўровларга фойдаланувчилар томонидан қолдирилган изоҳлар ва тавсиялардан фойдаланилган. 

Унга кўра, ўтган бир йилдан ортиқроқ вақт мобайнида гуруҳда 112 марта «яхши провайдерни маслаҳат беринг», деган мавзу муҳокамага ташланган. Бунда, бу каби мурожаатларга биринчи бўлиб, «бизда яхши провайдерларни унутинг» ёки «уларнинг барчаси бир» дея жавоб беришган бўлса, бошқалари ўз провайдерларининг сифатсиз хизмат кўрсатишидан нолишган. Бошқалари ғамгин мемлар қўйиб, «ўзбек интернети ҳақидаги қиссадан кўра ғамгин қисса бўлмаса керак» деб таъкидлашган.   

Албатта, маслаҳат берганлар ва ўзлари фойдаланаётган провайдерларни мақтаганлар ҳам бўлган. Сифатли хизматларини таклиф қилган провайдер вакилларининг ҳам қайдлари кўзга ташланган. Рейтинг тузувчилари истеъмолчилар қайси провайдерни кўпроқ олқишлагани ёки тавсия қилганини аниқлашган. Шундай қилиб, жами тавсиялар сони 972тани ташкил этган. Олинган маълумотлардан рейтинг жадвали тузиб чиқилди. 

Шундай қилиб, Потребитель.уз таснифига кўра, Turon Telecom, Sarkor, Uzonline энг яхши провайдерлар деб топилди. Қуйида ушбу рейтинг натижаси билан танишиш мумкин.

Эслатиб ўтамиз, Кун.uz таҳририяти ҳам 2016 йилда Ўзбекистондаги интернет провайдерлар фаолиятига доир ўз сўровини ўтказган эди

Сўровнома: Истеъмолчилар Ўзбекистондаги интернет сифатига баҳо беришди