«Ўзбекистон ҳаво йўллари» Миллий авиакомпанияси 4 апрель куни Тошкентдан Душанбега биринчи рейсни амалга ошириш режаси яна амалга ошмади.

Авиакомпания матбуот хизматининг «Кун.uz»га маълум қилишича, рейсга етарлича чипта сотилмагани туфайли 4 апрелга белгиланган рейс номаълум муддатга қолдирилган. У қўшимча маълумот бера олмади.

Навбатдаги уриниш. Душанбега рейс албатта бўлади

Эслатиб ўтамиз, 2016 йилнинг ноябрь ойида Ўзбекистон ва Тожикистон 1992 йили тўхтатилган авиақатновларни 2017 йил бошида қайтадан йўлга қўйишга келишиб олган эди. Авиарейсларни Тожикистон томонидан Somon Air, Ўзбекистон томонидан «Ўзбекистон ҳаво йўллари» авиакомпаниялари амалга ошириши белгиланганди. 

Somon Air авиакомпаниясининг Тошкентга биринчи рейси 20 февралга режалаштирилган эди, аммо авиакомпания зарур ҳужжатларни ўз вақтида тақдим этмагани сабабли парвоз бекор қилинди.

Шундан буён томонлар ушбу рейсни амалга ошира олмай келмоқда.