Франция президентлик сайловларининг иккинчи босқичида сайланган Эммануэль Макрон расман ўз лавозимига киришди. 

Франсуа Олланднинг Макронга ҳукуматни топшириш маросими якшанба куни эрталаб Елисей саройида бўлиб ўтди. Режадан икки карра узоқроқ вақт давом этган музокаралардан сўнг Олланд давлат раҳбари қароргоҳини тарк этди.

Қароргоҳнинг янги соҳиби тантанали маросимларда қатнашиш учун қолди. Франция Конституцион кенгаши раҳбари Лоран Фабиус 7 май куни овоз бериш жараёнининг якуний натижаларини эълон қилганидан сўнг Макрон расман мамлакат президенти бўлди.

Елисей саройидаги инаугурация маросимида янги сайланган президент ўзининг сайлов олди мажбуриятларининг бирортасидан чекинмаслигини таъкидлади.

"Биз тарихимиздаги энг яхши саҳифаларни битиш учун бирлашишимиз керак. Дунё ҳар қачонгидан кўпроқ Францияга муҳтож. Менга ҳар бирингизнинг қўллаб-қувватлашингиз керак бўлади", - дейди Макрон. 

"Биз французларга ўзига бўлган ишончни қайтаришимиз керак", - дея қўшимча қилди у.