Ливия жанубида авиабаза учун жангларда камида 60 киши ҳалок бўлди. Бу ҳақда Reuters ахборот агентлиги ҳарбий ва тиббий манбаларга иқтибос келтирган ҳолда хабар бермоқда. 

Бирак шаҳрида жойлашган аэродром 18 май куни Учинчи куч деб аталувчи кучлар отрядлари томонидан ҳужумга учраган. Улар базани оғир артиллерия ва ёппасига ўт очиш тизимлари билан ўққа тутишган. Ҳудудни назорат қилаётган Ливия миллий армияси жангчилари ҳужумни қайтаришга муваффақ бўлишган.

Тиббий ходимларнинг маълум қилишича, тўқнашувлардан кейин Бирак шифохонасига 60 киши жасади етказилган. Қурбонлар орасида ҳарбийлар билан бир қаторда оддий фуқаролар ҳам бўлган. Шу билан бирга армиянинг 12-бригадаси вакили ҳужум 86 кишининг ҳалок бўлишига олиб келган бўлиши мумкинлигини маълум қилган.