OTMlarga kirishda abituriyentlarni yuzdan tanuvchi va barmoq izlari skaneri texnologiyalari qo‘llanadi

Bugun Xalqaro Press-klub (XPK)da O‘zbekiston oliy ta'lim tizimida olib borilayotgan islohotlar va 2017-2018 o‘quv yili uchun abituriyentlar qabuliga bag‘ishlangan anjuman bo‘lib o‘tdi. 

"Kun.uz" xodimining so‘zlariga ko‘ra, anjumanda 2017-2018 o‘quv yilidagi OTMlarga kirish imtihonlarida shaffoflik masalasi ko‘tarildi. 

"Hozir Toshkent Axborot texnologiyalari universiteti tashabbusi bilan shunday usul sinab ko‘rilmoqda. Bu juda katta qulayliklarga olib keladi, albatta", - deyildi XPKda. 

Shaffoflik masalasida, ma'lum bo‘lishicha, hozirda abituriyentlarning OTMlarga kirish imtihonlariga qo‘yilishida barmoq izlari skaneri texnologiyasi sinovdan o‘tkaziladi. Biroq barcha filiallarda ham ushbu texnologiyani joriy qilish imkoni mavjud emas, chunki bir institutga hujjat topshirgan abituriyentlar bir necha binoda imtihondan o‘tadi, ularning har birida bu texnologiyani joriy qilish imkoni hozircha yo‘q. 

Shuningdek anjumanda har bir abituriyentning bu jarayondan o‘tishining o‘ziga kamida 20 soniya vaqt ketishi va agar shu kabi texnik muammolar bartaraf etilsa, maqsadga muvofiq bo‘lishi ta'kidlandi. 

Milliy universitet rektori bu borada quyidagi yangiligi bilan bo‘lishdi: 

"Axborot texnologiyalari universiteti bilan birga yangi texnologiyalarni joriy qilishga kirishdik. Bu yerda dasturiy vositalarning ishonchliligi, xavfsizligi masalalari ham bor - ularni hal qilmay, keyingi bosqichga o‘tib bo‘lmaydi. 

Yangiliklarimizdan biri, joriy yilda O‘zbekiston Milliy universiteti hududida bepul wi-fi o‘rnatiladi, u  universitetning butun hududini qamrab oladi. 

Yana bir yangilik - Axborot texnologiyalari universiteti barmoq izlari skaneridan foydalanayotgan bo‘lsa, biz abituriyentning yuzidan tanishga mo‘ljallangan skanerni sinovdan o‘tkazdik. Bu texnologiya 1-1,5 soniyada shaxsni tasdiqlab bera oladi. Biz joriy yildan boshlab ana shu texnologiyani amalda qo‘llab ko‘rmoqchimiz".