ОТМларга киришда абитуриентларни юздан танувчи ва бармоқ излари сканери технологиялари қўлланади

Ўзбекистон 07 Июнь 2017 26550
Фото: ЎзА

Бугун Халқаро Пресс-клуб (ХПК)да Ўзбекистон олий таълим тизимида олиб борилаётган ислоҳотлар ва 2017-2018 ўқув йили учун абитуриентлар қабулига бағишланган анжуман бўлиб ўтди. 

"Кун.уз" ходимининг сўзларига кўра, анжуманда 2017-2018 ўқув йилидаги ОТМларга кириш имтиҳонларида шаффофлик масаласи кўтарилди. 

"Ҳозир Тошкент Ахборот технологиялари университети ташаббуси билан шундай усул синаб кўрилмоқда. Бу жуда катта қулайликларга олиб келади, албатта", - дейилди ХПКда. 

Шаффофлик масаласида, маълум бўлишича, ҳозирда абитуриентларнинг ОТМларга кириш имтиҳонларига қўйилишида бармоқ излари сканери технологияси синовдан ўтказилади. Бироқ барча филиалларда ҳам ушбу технологияни жорий қилиш имкони мавжуд эмас, чунки бир институтга ҳужжат топширган абитуриентлар бир неча бинода имтиҳондан ўтади, уларнинг ҳар бирида бу технологияни жорий қилиш имкони ҳозирча йўқ. 

Шунингдек анжуманда ҳар бир абитуриентнинг бу жараёндан ўтишининг ўзига камида 20 сония вақт кетиши ва агар шу каби техник муаммолар бартараф этилса, мақсадга мувофиқ бўлиши таъкидланди. 

Миллий университет ректори бу борада қуйидаги янгилиги билан бўлишди: 

"Ахборот технологиялари университети билан бирга янги технологияларни жорий қилишга киришдик. Бу ерда дастурий воситаларнинг ишончлилиги, хавфсизлиги масалалари ҳам бор - уларни ҳал қилмай, кейинги босқичга ўтиб бўлмайди. 

Янгиликларимиздан бири, жорий йилда Ўзбекистон Миллий университети ҳудудида бепул wi-fi ўрнатилади, у  университетнинг бутун ҳудудини қамраб олади. 

Яна бир янгилик - Ахборот технологиялари университети бармоқ излари сканеридан фойдаланаётган бўлса, биз абитуриентнинг юзидан танишга мўлжалланган сканерни синовдан ўтказдик. Бу технология 1-1,5 сонияда шахсни тасдиқлаб бера олади. Биз жорий йилдан бошлаб ана шу технологияни амалда қўллаб кўрмоқчимиз". 

 

Кўпроқ янгиликлар