Кейинги кунларда электрон оммавий ахборот воситалари ва ижтимоий тармоқларда Боровский номидаги Тошкент медицина коллежининг ёпилиши ҳақида миш-мишлар ва тахминлар илгари сурилмоқда.

Маълумки, ушбу коллеж ўқувчиси Жасурбек Ибрагимов ўз коллеждоши (ёки коллеждошлари — буниси ҳозирча ноаниқ) томонидан етказилган тан жароҳатларидан сўнг вафот этгани ҳақида хабарлар тарқатилган, пойтахтимизда эса бу воқеанинг айбдорлари қонунда белгиланган адолатли жазосини олиши борасида петиция ҳам уюштирилган эди.

Кейинроқ коллеж директори Лутфи Юсупова ҳам ўз вазифасидан озод этилгани маълум бўлди.

Таҳририятимизга коллеж ўқувчиларидан бири — Эльзара исмли қиздан мурожаат келиб тушди. Талаба қиз севимли коллежининг ёпилиши мумкинлигидан ўзи ва коллеждошлари чуқур изтиробда эканлигини баён этган.

Коллеж ўқувчисининг юракдан ёзилган сўзларига эътибор берсак, ўқув даргоҳида унинг ёпилиши ҳақида гап-сўзлар чиндан ҳам тарқаган. Гарчи ҳозирча мутасадди органлар томонидан бу борада бирорта расмий баёнот берилмаган эса-да.

«Биз П.Ф.Боровский номидаги медицина коллежига ўқишга кириш — орзумиз амалга ошиши учун қанчалар меҳнат қилдик, ўқишга пухта тайёрландик, бу йўлда қанча асабларимизни сарфладик. Имтиҳонлардан ўтдик, шундан кейин ҳам анча вақт ҳаяжонланиб юрдик ва ниҳоят биз кутган шукуҳли онлар келди: «Сиз ўқишга қабул қилиндингиз...»

Биз, албатта, Тошкентдаги халқаро миқёсларга чиққан, талабалари ҳар йили халқаро танловларда совринли ўринларни ютиб келадиган, орзуларимизни рўёбга чиқарадиган ягона медицина коллежининг талабаси бўлганимиздан жуда бахтли эдик.

Бу ерда бир йиллик ўқиш мобайнида биз кўплаб дўстлар орттирдик, билимимизни мустаҳкамлаб, тажриба тўпладик — буларнинг барчаси учун устозларимизга чексиз ташаккур, энди эса келажакка режалар қуриш билан банд эдик: ҳар биримиз етук врач, ўз ишининг устаси бўлиб етишишни орзу қилаётганди.

Энди бизнинг режаларимиз барбод бўлай деб турибди. Тошкентдаги бирорта медицина ўрта-махсус билим юрти бу ерда олган билимларимизни бизга бера олмайди. Четдан туриб вазиятга баҳо бераётган, коллежимизда ҳеч қачон бўлмаган айрим кишилар наҳотки бизнинг коллежимизда рўй бераётган воқеалардан биздан кўпроқ бохабар бўлса?

Йигитларни безори, қизларини беҳаё, дея ўқувчиларни, коллеж раҳбарияти ва унинг нуфузини ҳақорат қилишдан не наф? Айнан бизнинг коллежимизда ўқиган бола билан юз берган ҳодиса ОАВда катта шов-шув кўтарди, ҳаттоки ЮНИСЕФ ташкилотигача муносабат билдирди, бундай воқеалар эса бошқа ҳар қандай ўқув юртларида ҳам юз беримоқда-ку?

Қани бу ерда ҳамма тилга олаётган адолат мезони? Нега ҳуқуқ-тартибот органларидан бирор киши ўқувчиларни суҳбатга тортмади? Биз узоқ вақт сукут сақлаб, бу нарсалардан юқорироқ туришга ҳаракат қилдик, қарши петиция уюштиришдан ўзимизни тортдик.

Бироқ, нега айбсиз талабаларни бу тарзда жазоланмоқда? Инсонни медицинадан суғуриб олиш мумкиндир, бироқ медицинани ҳеч қачон инсондан жудо қилиб бўлмайди! Мен бошқа бир касбда ўзимни синаб ҳам кўрмоқчи эмасман. Менинг мақсадим — етук генетик бўлиб етишиш ва юртимизда медицинанинг шу йўналишини ривожлантириш. Бироқ яхши кадрларга ўқиш имконияти берилмаса, у олий ўқув юртига кира олмаса, ўқишни битирганида эса иш топа олмаса, ёки ҳозиргидек, кўз ўнгингда эшикни қарсиллатиб ёпишса — фаннинг ривожланиши ҳақида қандай гап бўлиши мумкин?

Келинглар, вазиятга йўл қўйган раҳбарият ишдан олингани, айбдорлар жазоланиши билан бас қилайлик. Бизга шу масканда миш-мишлар нишони бўлиш учун эмас, фахр билан ўқишимизни якунига етказиш учун имкон беринглар. Боровский — бизнинг умумий уйимиз, катта оиламиз!

Бизни ўқиганлар ва тушунганларнинг барчасига ташаккур билдираман».