Жаҳондаги энг йирик чўл бўлмиш Саҳрои Кабирнинг четлари ва қурғоқчилик исканжасида қолган ҳудудлари яқин юз йил ичида глобал исиш туфайли ёғингарчилик миқдорининг ошиши ортидан яшилликка бурканиб, саваннага айланиши мумкин, дейишмоқда иқлимшунослар ўзларининг Earth System Dynamics журналида чоп этган мақоласида. 

«Глобал исиш чиндан ҳам иқлимни радикал тарзда ўзгаришга олиб келиши мумкин. Жаҳоннинг кўплаб минтақаларида у қурғоқчилик ва қишлоқ хўжалиги экинларининг ҳосилдорлиги камайишига сабаб бўлиши турган гап, бироқ Саҳрои Кабирнинг бир чети бўлмиш қуруқ Соҳилда у, аксинча, сув билан боғлиқ вазиятни яхшилаши ва чорвадорлик ҳамда қишлоқ хўжалиги учун қулай шароитлар яратилишига олиб келиши мумкин», —  дейди  Германиянинг Потсдам иқлимга оид тадқиқотлар институти олими Якоб Шеве.

Саҳрои Кабир чўли ҳар доим ҳам қум билан қопланган бўлмаган. 10 минг йил аввал ва тахминан 30–50 минг йил муқаддам у ўт-ўланлар ва дарахтлардан иборат улкан яшил текислик бўлган. Антропологларнинг фикрича, яшил Саҳрои Кабир инсониятнинг қадимий аждодлари Африкадан чиқиб, бутун Ер куррасига тарқалиши учун замин бўлган. 

Шевенинг ҳикоя қилишича, сўнгги бир неча миллион йиллар ичида Саҳрои Кабир бир неча бор яшилликка бурканиб, яна чўлга айланиб, ўз қиёфасини Ер иқлими тебранишларига монанд ўзгартириб турган.

Бугунги кунда иқлим ўзгаришлари жуда тезлашган. Бу эса Шева ва унинг ҳамкасбларини яқин юз йил ичида Соҳил ва унинг атрофи қандай ўзгаришларга дучор бўлишини текшириб кўришга ундаган.

Бунинг учун олимлар океанлардаги оқимларнинг, Африка атмосферасидаги шамолларнинг ўзгариши, ўрта йиллик ҳароратнинг кейинги йилларда ҳам ошиб бориши билан боғлиқ 30 та турлича иқлимий моделларни яратишган. 

Моделларнинг ўнтаси Саҳрои Кабирда 2100 йилга бориб ҳозиргидан 40–300 фоиз кўпроқ ёғингарчилик юз бериши ва бу кўпайиш иқлимий модел маълум бир ҳарорат чегарасини босиб ўтгач, жуда тез — 5-10 йил ичида содир бўлишини кўрсатган. Натижада Чад, Нигер, Мавритания, Мали ва Африканинг бошка кўплаб чўлли давлатларининг ҳудудлари жунгли ва саванналар билан қопланиб, тропик Африка мамлакатлари сингари ёғингарчиликка эга бўлади.