Twitter’даги хабарларнинг машҳурлигини кузатиб борувчи Favstar нашри статистикасидан маълум бўлишича, АҚШнинг собиқ президенти Барак Обаманинг Шарлотсвиллдаги тартибсизликлардан кейин чоп этган твити 2,9 млн дан кўпроқ “лайк” (“ёқди”) йиққан. Уч кун ичида бу твит 1,2 млн фойдаланувчи томондан бошқаларга жўнатилган. Шу тариқа Обаманинг твити Twitter тарихидаги энг машҳур твитга айланди.

Обама ўз твитида машҳур ҳуқуқ ҳимоячиси Нельсон Манделанинг сўзларини келтириб ўтди. Бу цитата тўлиқ қуйидагича янграйди: “Ҳеч ким териси ранги, мавқеи ёки дини сабабли бошқа одамга нисбатан нафрат билан туғилмайди. Одамлар нафратланишни ўрганадилар, улар нафратланишни ўргана олар эканлар, уларни муҳаббатга ўргатишга ҳаракат қилиш керак, чунки муҳаббат одам қалбига анча яқинроқдир”. Твиттерда белгиларни киритишга чеклов борлиги сабабли Обама ушбу цитатани уч қисмга бўлиб чоп этган. Цитатанинг айнан биринчи қисми машҳурлашиб кетган. Собиқ президент унга бир суратини илова қилган. Суратда у Мэриленд штатидаги болалар боғчаси ёнида турибди, унга эса боғча ойнасидан турли ирқдаги болакайлар қараб туришибди. Цитатанинг 2- ва 3-қисмлари эса миллионтадан “лайк” йиққан.

Аввал твиттерда машҳурлик бўйича қўшиқчи Ариана Гранденинг Манчестердаги концертида содир бўлган портлашдан кейин чоп этган твити етакчи эди. У твитида “Ғам-ғуссадан ёнмоқдаман. Чин юракдан жуда афсусдаман. Айтишга сўзим йўқ” деб ёзганди. Бу твит 2,7 млн та “лайк” ва 1,2 млн та ретвит йиққанди.