KXDR uchirgan raketa Shimoliy Amerika va Guamga tahdid soldimi?

AQSh QK Tinch okeani qo‘mondonligi rasmiy vakili Deyv Benemning ma'lum qilishicha, Shimoliy Koreya uchirgan o‘rta masofadagi ballistik raketa Shimoliy Amerika hamda Guam oroliga tahdid uyg‘otmagan. Bu haqda Sand Hills Express xabar bermoqda.

Uning so‘zlariga ko‘ra, AQSh Tinch okeani qo‘mondonligi KXDR tomonidan uchirilgan raketani qayd etgan va kuzatib borgan.

Benemning ta'kidlashicha, «Shimoliy Amerika aerofazoviy mudofaa qo‘mondonligi (NORAD) ballistik raketa bu mintaqaga xavf tug‘dirmasligini aniqladi», AQSh Tinch okeani qo‘mondonligi esa raketa Qo‘shma Shtatlarning Tinch okeanidagi yirik strategik harbiy bazasi joylashgan Guam oroliga tahdid uyg‘otmaganini bildirdi.

Avvalroq Shimoliy Koreya Tinch okeani tomon raketa uchirgani xabar berildi. Shundan so‘ng Janubiy Koreya KXDR harakatiga javoban darhol o‘z ballistik raketasini uchirdi. Biroz o‘tib esa KXDR raketasi qancha masofani uchib o‘tgani va qanday balandlikka ko‘tarilgani ma'lum bo‘ldi.