Ўзбекистон Республикаси Президенти Шавкат Мирзиёев Мексика раҳбарига ҳамдардлик мактуби йўллади. Бу ҳақда Ташқи ишлар вазирлиги сайтида хабар берилган.

«Мексикадаги талофатли зилзила оқибатида кўплаб инсонларнинг ҳалок бўлганлиги ҳақидаги хабар бизни чуқур қайғуга солди» – дейилади Шавкат Мирзиёевнинг Мексика Қўшма Штатлари Президенти Энрике Пеня Нетога йўллаган мактубида.

Давлат раҳбари бутун Мексика халқига, шунингдек, нобуд бўлганларнинг оила аъзолари ва яқинларига ҳамда жароҳатланганларга самимий ҳамдардлик ва далда сўзларини етказишни сўради.

Аввалроқ Мексикада 19 сентябрь куни юз берган кучли зилзила оқибатида ҳалок бўлганлар сони ҳозирги пайтга келиб 286 кишини ташкил этгани хабар берилганди.