Olimlarning bergan ma'lumotlariga ko‘ra, osmon jismi sayyoramizdan 87 ming kilometr yaqinlikda uchib o‘tgan, deb yozadi TASS.
Avtobus kattaligidagi asteroid dushanba kuni to‘qnashish xavfini keltirib chiqarmasdan, Yer kurrasiga nisbatan yaqin masofada uchib o‘tgan. Bu haqda NASAning Kaliforniya shtati Pasadina reaktiv harakat laboratoriyasida joylashgan osmon jismlarini o‘rganish markazi xodimlari ma'lum qilishgan.
Markazning saytida e'lon qilinishicha, 2017 SX17 deb nomlangan asteroidning ko‘ndalang kesimi 6,3 metrdan 14 metrgacha yetadi. U Toshkent vaqti bilan soat 15:20da sayyoramiz va bizdan 384 ming kilometr uzoqlikda bo‘lgan Oy o‘rtasidan uchib o‘tib, Yerga 87 ming kilometrgacha yaqinlashgan.
Bu asteroid faqat 24 sentabrga kelib aniqlangan. Olimlarning hisob-kitobiga ko‘ra, u Quyosh atrofida 467 sutkada bir marta to‘liq aylanish hosil qiladi.
NASA mutaxassislari hozir katta qiziqish bilan boshqa bir asteroid — 2012 TC4ni kuzatishmoqda. U 12 oktabr kuni Yerdan 43,5 ming km masofadan uchib o‘tadi. Kosmik jismning diametri 12 dan 27 metrgacha yetadi va uni 2013 yilning 15 fevralida atmosferaga soniyasiga 18 km tezlikda uchib kirgan va 25 km balandlikda portlab ketgan Chelyabinsk meteoritiga qiyoslash mumkin. U meteoritning qulashi 90 kmgacha bo‘lgan masofada zarba to‘lqinlari tarqalishi bilan davom etgan.
Ayni paytda NASA ko‘ndalang kesimi 1 km.dan ortiq bo‘lgan, sayyoramizga potensial xavf soluvchi yirik asteroidlarning 93 foizini aniqlashgan. Taxminan mingdan ortiq ana shunday osmon jismlari Quyoshdan 195 mln. km uzoqlikda uchmoqda. Olimlar shuningdek, Yer orbitasi yaqinidagi o‘rtacha kattalikdagi (100 metrdan 1 km.gacha) asteroidlarning sonini ham aniqlashga muvaffaq bo‘lishgan: ularning soni 19,5 mingdan ziyod ekan.
