Кореянинг йирик тўқимачилик корхоналари “Posco Daewoo”, “Color Paradise”, “Solsang International Corp.”, “RATEL E&T Co, Ltd”, шунингдек “Lotte Marte”савдо тармоғи раҳбарлари билан 2017-2018 йилларда Ўзбекистонда тўқимачилик маҳсулотларини экспорт қилиш бўйича 70 млн.доллар миқдоридаги шартномалар имзоланди. 

“Ўзбекенгилсаноат” АЖ​ ахборот хизмати берган маълумотда айтилишича, кореялик тадбиркорларга “UzTex” компаниясининг ҳамда “Osborn” тўқимачилик маҳсулотлари жуда ёққан. Шунингдек, улар “Bofondo” ва “Bonito” бренди остида чиқадиган жинси ва тўқимачилик маҳсулотларини юқори баҳолашган.

Ўзбекистон делегацияси ва Корея Республикаси Халқаро савдо Ассоциацияси ва Миллий электрон савдо майдончаси раҳбарияти билан бўлиб ўтган учрашув доирасида 2017-2018 йилларда Ўзбекистон тўқимачилик маҳсулотларини “KOREA Trade” электрон савдо майдончасида сотиш бўйича ўзаро ҳамкорликдаги шартномалар имзоланган. Энди Ўзбекистонинг Корея Республикасидаги корхоналари ва Кореянинг импорт ва транспорт билан шуғулланадиган корхоналари божхона ҳужжатларини электрон шаклда тўлдиришлари мумкин. 

Бир йил давомида 2 млрд доллар миқдоридаги бренд маҳсулотларни ишлаб чиқараётган ҳамда бугунги кунда Бангладеш, Вьетнам, ХХР, Сан-Сальвадордаги ишлаб чиқариш корхоналари орқали 90 миллион ортиқ  кишини иш билан таъминлаган “Youngone Corparation” раҳбарлари билан учрашув ўтказилган. Учрашув доирасида Тошкент вилояти Бўка туманида рангчилик ва тикувчилик ишлаб чиқариш корхонасини қуриш борасида лойиҳа ва Самарқанд шаҳридаги  дизайнерлик ўқув маркази билан тикувчилик маҳсулотларини ишлаб чиқариш, Самарқанд шаҳридаги “Эл мероси” маданият марказининг фаолиятидаги ижтимоий лойиҳаларни амалга оширилишини қўллаб-қувватлаш борасида шартномалар имзоланган.

“Youngone Corparation” компанияси томонидан жалб қилинадиган тўғридан-тўғри инвестицияларнинг умумий миқдори 20 миллион долларни ташкил қилади.

Яна бир омадли ўтган музокаралардан бири “Daewon Co Contavil” (Корея ва Ветнамда йирик жун ва ярим жун матоларини ишлаб чиқарадиган корхона) ва “Samwon Ind Co., Ltd” компаниялари раҳбарлари билан бўлиб ўтган.

Учрашув доирасида Ўзбекистонда босқичма-босқич тўқимачилик саноати учун бўёқлар ва кимёвий маҳсулотлар ишлаб чиқариш ва мактаб формалари, кўйлакбоп ҳамда бошқа турдаги матолар ишлаб чиқариш бўйича ўзаро манфаатли шартномалар имзоланган.

“Daewon” компанияси эса “IVYclub”нинг хусусий брендидаги мактаб формалари кўргазмасини ўтказган.

“Ўзбекенгилсаноат” давлат акциядорлик жамияти Корея Республикасида  умумий миқдори 30 млн. доллардан ортиқ  бўлган 7та инвестицион қўшма лойиҳалар имзолашни режалаштирган.