Туркия президенти Ражаб Тоййиб Эрдўған яқин кунларда Грецияга ташриф буюради. Бу ҳақда Туркия бош вазири ўринбосари Ҳакан Човушўғлуга иқтибос келтирган ҳолда “Анадолу” ахборот агентлиги хабар бермоқда.      

“Президентимиз охирги 65 йил ичида Грецияга ташриф буюрадиган илк Туркия президенти бўлади. Ўйлашимча, бу ташриф сезиларли натижалар беради”, деб айтди Човушўғлу. 

Таъкидланишича, ташриф санаси кейинроқ аниқлаштирилиб, маълум қилинади.

Охирги марта Туркия президентларидан Маҳмуд Жалол Баёр 1952 йилда Грецияга ташриф буюрган.

Греция ва Туркия ўртасидаги муносабатлар азалдан яхши бўлмаган. 20-аср бошида икки давлат 3 марта ўзаро уруш олиб борган – 1912 йил Биринчи Болқон уруши вақтида, 1914-1918 йилларда Биринчи жаҳон уруши вақтида ва 1920-1922 йилларда грек-турк уруши. 

Афина ва Анқара тинчлик сулҳини имзолагандан кейин миллий озчиликлар муаммосини ҳал қилишга муваффақ бўлганлар: 1922 йилдан 1924 йилгача Туркиядан Грецияга 1,3 млн грек, Грециядан Туркияга 350 минг турк депортация қилинган.

1974 йилда Кипр ороли атрофидаги баҳс – грек-киприотлар ва турк-киприотлар ўртасидаги можаро сабабли икки давлат ўртасида яна қарама-қаршилик вужудга келган. Ўшанда Афинада ҳукмронлик қилган “қора полковниклар” Кипрнинг Грецияга қўшиб олишини эълон қилишган. Бунга жавобан Анқара Кипрнинг турк аҳолисини ҳимоялаш важи билан оролнинг шимолий қисмига қўшин олиб кирган. Кейинроқ у ерда Шимолий Кипр турк республикаси ташкил этилган. Бу республикани дунёда фақат Туркиянинг ўзигина тан олади.

1987 йилда Греция ва Туркия Эгей денгизида нефтга бой шельф сабабли яна низога борган. Ўшанда ғарб давлатлари воситачилигида ихтилофнинг олди олинган. Натижада иккала давлат ҳам шельфни бурғилашдан воз кечган.