Dushanbening bosh kommunisti firibgarlikda gumonlanmoqda

Tojikiston Kommunistik partiyasining Dushanbe shahar bo‘linmasi rahbari Subxon Safialloyev firibgarlikda gumonlanmoqda, deya xabar berdi Asia Plus.

Uni mamlakatning korrupsiyaga qarshi kurash mahkamasida so‘roq qilishgan, deb ma'lum qildi mamlakat huquqni muhofaza qilish organlaridagi manba.

Uning ma'lumotiga ko‘ra, Safialloyev yuqori mansabli davlat amaldorining hukumat aloqasi bo‘yicha telefonidan hamda uning nomidan davlat muassasalaridan biriga qo‘ng‘iroq qilgan va kasal ayolni davolash uchun moliyaviy yordam ko‘rsatishni so‘ragan.

Hozirda Subxon Safialloyev ozodlikda ekani aytilmoqda, biroq unga nisbatan tergov boshlangan. Uning xalq deputatlari shahar majlisidagi vakolatlari muddatidan avval to‘xtatildi.

Jurnalistlar Safialloyev bilan bog‘lana olishmadi, Tojikiston Kommunistik partiyasi esa bu borada izoh berishdan bosh tortgan.