«Katta rahmat». Poroshenko Rossiyaga qarshi sanksiyalar uzaytirilganidan xursand

Ukraina prezidenti Pyotr Poroshenko Yevropa ittifoqiga a'zo mamlakatlar yetakchilariga Rossiyaga nisbatan iqtisodiy sanksiyalar muddatini uzaytirish bo‘yicha qabul qilingan qaror uchun minnatdorchilik bildirdi.

«Germaniya kansleri Angela Merkel hamda Fransiya prezidenti Emmanuel Makronga «normand shakli» bo‘yicha sheriklar sifatida, shuningdek YeIdagi barcha do‘stlarimizga Ukrainani qo‘llab-quvvatlaganliklari uchun rahmat, deyman», - deya yozdi Poroshenko feysbukdagi o‘z sahifasida.

Uning ta'kidlashicha, bu «Moskvaga o‘z majburiyatlarini bajarmaganligi uchun yaxshi javob hamda Kreml siyosatida o‘zgarishlar yuz berishi lozimligiga oid aniq chaqiriqdir».

Eslatib o‘tamiz, avvalroq Yevropa ittifoqi davlatlari yetakchilari Rossiyaga qarshi joriy etilgan iqtisodiy sanksiyalarni 2018 yilning o‘rtasiga qadar uzaytirish haqidagi qarorni qabul qilishgani xabar berilgandi.